Grýzııada qaza bolǵan 4 týrıstiń arasynda joǵalyp ketken qazaqstandyq joq - QR SІM
ASTANA. QazAqparat - Grýzııada joǵalyp ketken qazaqstandyq týrıst Sergeı Trofımovty izdeý jalǵastyrylýda. Bul týraly «QazAqparat» HAA-ǵa QR syrtqy ister mınıstrligi baspasóz qyzmetiniń jetekshisi Ánýar Jaınaqov habarlady.
Atap óteıik, búgin reseılik BAQ-ta Grýzııadaǵy Ýshba taýyna shyǵý kezinde RF azamaty, sondaı-aq Estonııanyń jáne eki Izraıl azamattary qaza bolǵanyn habarlady. Onda reseıliktiń aty-jóni kórsetilmegen.
«Bul bizdiń azamatymyz emes. Bizdiń jigit áli tabylǵan joq», - dedi Á.Jaınaqov.
Eske sala keteıik, ony izdep áleýmettik jelilerde dabyl qaqqan joǵalyp ketken jigittiń dosy Ánýar Dúısenbınov bolatyn. Onyń aıtýynsha, Qazaqstan jáne Reseı arqyly avtogkólikpen sapar shekken Sergeı 6 shildede Grýzııaǵa soqqan, ol Vladıkavkaz jaǵynan shekarany kesip ótken. Tbılısıde shamamen 13 shildege deıin bolǵan. Onymen baılanys úzilgenshe, Sergeı Borjomıde, Kýtaısıde, Svanetııada, Mestııada jáne Ýshgýlıde boldy.
«22 nemese 23 shilde kúni Sergeıdi Ýshgýlıden kórgen. Ol sonda túnep qalǵan bolýy múmkin. Taýǵa shyǵyp kelemin dep, jergilikti adamdarǵa asynatyn sómkesin qaldyryp ketken. Olar erli-zaıypty ızraıldyqtar bolsa kerek. Saǵat 07:00-de Sergeı zaıybymen sońǵy ret habarlasqan. Sol kúni Gelendjıktegi dosy Sergeı saǵat 12-ler shamasynda WhatsApp,-qa qos kók belgi salǵan, bul Sergege bul habarlamalar jetkenin jáne ony oqyǵanyn bildiredi», - dep habarlady Ánýar Dúısenbınov.
