Grýzııada ınflıatsııanyń ósýi: azyq-túlik pen medıtsınalyq qyzmetter qymbattady

ASTANA. KAZINFORM — Grýzııada ınflıatsııa 4,8%-ǵa jetip, azyq-túlik baǵasynyń ósýi boıynsha sońǵy eki jyldaǵy rekordty jańartty, dep habarlaıdy, dep habarlaıdy Kazinform agenttiginiń menshikti tilshisi «Sakstat» Ulttyq statıstıka qyzmetine silteme jasap.

Baǵalardyń negizgi ósimi azyq-túlik pen alkogolsiz sýsyndardyń bir jyl ishinde 11,9%-ǵa qymbattaýymen baılanysty ekeni habarlandy.

Vedomstvo málimetteri boıynsha, 2025 jylǵy qyrkúıekte Grýzııadaǵy jyldyq ınflıatsııa 4,8%-ǵa jetip, eki jyldyq maksımýmdy jańartty, al aılyq ósim 0,5%-dy qurady.

Aılyq ınflıatsııa tamyz aıymen salystyrǵanda 0,5%-dy, al azyq-túlik pen energetıkalyq resýrstardy eseptemegendegi bazalyq ınflıatsııa jyldyq 2,1% shamasynda boldy.

Baǵalary eń kóp kóterilgen azyq-túlik ónimderi — ásirese jemister men júzim 25%-ǵa, kókónister men baqsha ónimderi 19,5%-ǵa qymbattaǵan. Maılar men maıly ónimder 16,4%, qant pen táttiler 15,1%, kofe men shaı 12,8% ósim kórsetti.

Densaýlyq saqtaý salasynyń qyzmetteri 9%-ǵa qymbattap, onyń ishinde ambýlatorııalyq qyzmetter (+9,2%), aýrýhanalyq qyzmetter (+9,4%) jáne medıtsınalyq quraldar (+8,1%) baǵasy ósti. Alkogol jáne temeki ónimderiniń baǵasy 4,1%-ǵa artty.

Baǵasy tómendegen jalǵyz sektor — kólik (-2,1%) boldy, biraq avtomobıl baǵasy 0,7%-ǵa qymbattady.

Ekonomısterdiń aıtýynsha, ınflıatsııa 2025 jylǵy aqpannan beri 3%-dyq maqsattyq deńgeıden joǵary qalyp otyr. Al 2025 jyldyń ekinshi toqsanynda naqty JІÓ ósimi 7,3%-dy qurap, boljanǵan 6%-dan asyp tústi.

Sarapshylar baǵalardyń ósýin azyq-túlik pen energetıkalyq resýrstardyń jahandyq qubylmalylyǵy jáne ishki suranystyń artýymen baılanystyrady.

Tamyz aıynda Grýzııa ekonomıkasynyń ósý qarqyny 6,3%-ǵa tómendegeni týraly habarlanǵan edi.