Grýzııada «Grýzııa úshin» partııasynyń jetekshisine shabýyl jasaldy

ASTANA.KAZINFORM — Batýmı qonaqúıleriniń birinde «Gaharııa — Grýzııa úshin» oppozıtsııalyq partııasynyń jetekshisi, burynǵy premer-mınıstr Georgıı Gaharııaǵa shabýyl jasaldy.

Grýzııa aqparat quraldarynyń habarlaýynsha, oqıǵa sársenbi kúni túnde bolǵan. Partııa músheleriniń aıtýynsha, shabýylǵa birneshe adam qatysqan.

Saldarynan saıasatker jaraqat alyp, jergilikti aýrýhanaǵa jetkizildi. Dárigerdiń aıtýynsha, Georgıı Gaharııanyń muryn súıegi synyp, mıy shaıqalǵan.

Alaıda medıtsınalyq kómek kórsetilgennen keıin ol óz erkimen aýrýhanadan shyǵyp ketken. Onyń jaǵdaıy qazir turaqty, dep jazady jergilikti jýrnalıster.

Sondaı-aq Gaharııaǵa jasalǵan shabýyldan bólek, dál osy qonaqúıde úkimettik emes sektordyń ókili Zvıad Korıdzemen qaqtyǵys bolǵany habarlandy.

Grýzııanyń Іshki ister mınıstrligi oqıǵaǵa qatysty tergeý bastady. Oqıǵanyń mán-jaıy jarııalanǵan joq.

Aıta keteıik, Grýzııa parlamenti ǵımaraty aldynda 48 kúnnen beri beıbit sherýler jalǵasyp jatyr. Qatysýshylardyń negizgi talaby — jańa parlament saılaýyn taǵaıyndaý jáne narazylyq kezinde ustalǵandardy bosatý.

Buǵan deıin Grýzııa ІІM qyzmetkerleri Gýdaýrı taý shańǵysy kýrortynda meıramhananyń 12 qyzmetkeriniń máıitin tapqanyn habarlaǵan edik.