Grýzııada esirtki qylmysyna qatysy bar 120-dan astam adam ustaldy
ASTANA. KAZINFORM — Grýzııa Іshki ister mınıstrliginiń qyzmetkerleri el aýmaǵynda júrgizilgen arnaıy operatsııa barysynda esirtki qylmystaryna qatysy bar degen kúdikpen 121 adamdy ustady, dep habarlaıdy Kazinform agenttiginiń óńirdegi menshikti tilshisi.
Vedomstvonyń málimetinshe, ustalǵandardyń 59-y esirtki taratý jelileriniń qyzmetine qatysy bar. Olardyń arasynda Grýzııa azamattarymen qatar sheteldikter de bar.
Sot sanktsııalary negizinde polıtsııa esirtki zattaryn baqylaýmen satyp alý sharalaryn júrgizgen. Bul operatsııalar aýdıo jáne beınejazbaǵa tirkelgen. Sonymen qatar quqyq qorǵaý organdary baqylanatyn poshta jóneltilimderin paıdalana otyryp arnaıy operatsııalar ótkizip, asa iri kólemdegi esirtki partııalaryn tárkilegen.
Tintý barysynda kúdiktilerdiń turǵylyqty jerlerinen, avtokólikterinen jáne ózge de nysandardan satýǵa daıyndalǵan asa iri kólemdegi esirtki jáne psıhotroptyq zattar tabylyp, tárkilendi. Olardyń qatarynda metadon, alfa-PVP, kokaın, ketamın, býprenorfın, marıhýana, qarasora ósimdikteri jáne basqa da esirtki túrleri bar.
Sondaı-aq qaptama materıaldary, elektrondy tarazylar jáne esirtki saýdasynan túsken bolýy múmkin aqsha qarajaty tárkilendi.
Tergeý Grýzııa Qylmystyq kodeksiniń esirtkini zańsyz satyp alý, saqtaý jáne ótkizýmen baılanysty birneshe baby boıynsha júrgizilip jatyr. Bul baptar boıynsha eń joǵary jaza 20 jylǵa deıin bas bostandyǵynan aıyrý nemese ómir boıyna bas bostandyǵynan aıyrý túrinde qarastyrylǵan.
Mınıstrliktiń málimetinshe, 2026 jyldyń alǵashqy alty aıynda esirtki qylmystary boıynsha 5 myńǵa jýyq adam qylmystyq jaýapkershilikke tartylǵan. Bul ótken jyldyń sáıkes kezeńimen salystyrǵanda 85%-ǵa kóp.
Vedomstvo quqyq qorǵaý organdary zańsyz esirtki aınalymyna qatysy bar barlyq tulǵalarǵa qatysty zańda kózdelgen eń qatań sharalardy qoldanýdy jalǵastyratynyn málimdedi.
Aıta ketelik Tájikstan–Aýǵanstan shekarasynda 1,5 tonnadan astam esirtki tárkilengen edi.
