Grýzııada eń bıik záýlim ǵımarattyń jobasy tanystyryldy
ASTANA. KAZINFORM — Grýzııa astanasy Tbılısıde Trump Tower Tbilisi jobasynyń resmı tanystyrylymy ótti. Joba júzege asqan jaǵdaıda, bul Grýzııadaǵy eń bıik ǵımarat ári eń iri developerlik jobalardyń birine aınalady. Bul týraly Grýzııanyń «Grýzııa Online» basylymy habarlady.
Trump Tower Tbilisi jobasynyń qurylysy sáýir aıynda jarııalandy. Bıiktigi 280 metrge jetetin munara alty bıik ǵımarattan turatyn The Downtown Tbilisi kesheniniń ortalyq bóligine aınalady.
Keshenniń jalpy aýmaǵy shamamen 600 myń sharshy metr. Onyń 100 myń sharshy metrdeı bóligi Trump Tower-ǵa tıesili bolady. Jobaǵa salynatyn ınvestıtsııa kólemi shamamen 2 mıllıard dollarǵa baǵalanyp otyr.
— Bıiktigi 280 metr bolatyn 62 qabatty munara — Tbılısı úshin batyl qadam. Joba qalanyń álemdegi jetekshi ýrbanıstik ortalyqtardyń qataryndaǵy tartymdylyǵyn arttyra túsedi. Grýzııa Eýropa men Azııany baılanystyratyn tabıǵı kópir rólin atqaryp keledi, — dedi Grýzııa premer-mınıstri Iraklıı Kobahıdze joba tanystyrylymynda.
Premer-mınıstrdiń aıtýynsha, Trump Tower Tbilisi jobasyn 2031 jyly aıaqtaý josparlanyp otyr. Al alty munaradan turatyn Downtown Tbilisi kesheniniń qurylysyn 2033 jyly aıaqtaý kózdelgen.
The Downtown Tbilisi kesheniniń quramyna turǵyn úı munaralary, lıýks sanatyndaǵy qonaqúı, keńse jáne saýda oryndary, joǵary sanatty meıramhanalar, oıyn-saýyq nysandary jáne premıým sanattaǵy bıznes-ortalyq kiredi.
Jobany iske asyrý úshin halyqaralyq qurylys merdigerin tartý josparlanyp jatyr. Sebebi Grýzııanyń qurylys naryǵynda ázirge mundaı aýqymdaǵy nysandardy salý boıynsha tájirıbe qalyptaspaǵan.
Developerler jobanyń negizgi satyp alýshylary retinde Grýzııada turaqty turmaıtyn sheteldik ınvestorlardy qarastyryp otyr.
Olardyń qatarynda dıplomattar, bıznesmender jáne Grýzııada jumys isteıtin kompanııalardyń ıeleri bar. Qazirgi tańda jobaǵa Dýbaı men Izraıldegi áleýetti ınvestorlar tarapynan aıtarlyqtaı qyzyǵýshylyq baıqalyp otyr.
Buǵan deıin Tbılısıde áıgili «Fýksas qubyrlaryn» bólshekteý jumystary bastalǵany habarlanǵan bolatyn.
Aqzat Jıenalına
