Grýzııada eldiń eks-premer-mınıstri tutqynǵa alyndy
TBILISI. 21 mamyr. QazAqparat - Búgin Grýzııanyń prokýratýrasy eldiń eks-premer-mınıstri, Biryńǵaı ulttyq qozǵalysynyń bas hatshysy Vano Merabıshvılıdi ustady.
Búgin suraq-jaýap alǵannan keıin prokýratýra ókili málimdegendeı, is V.Merabıshvılıdiń qyzmetindegi sybaılas jemqorlyqqa qatysty eki oqıǵaǵa baılanysty bolyp otyr.
Olardyń birinshisi, onyń Grýzııanyń premer-mınıstri bolyp turǵan kezde 2012 jylǵy Parlament saılaýynda Eńbek, densaýlyq saqtaý jáne áleýmettik qorǵaý mınıstri Zýrab Chıaberashvılımen birlesip, myńnan astam BUQ belsendilerin zańsyz túrde jumysqa alǵan, Qozǵalys belsendileri tek partııaǵa úgitteýmen aınalysqan jáne sol úshin memlekettik bıýdjetten jumyssyzdarǵa tólenýi tıis 5,2 mıllıon ları alǵan.
Ekinshi oqıǵa, V.Merabıshvılıdiń Kvarıatı aýylyndaǵy «Halyqaralyq ınvestıtsııalyq kompanııa» JShQ menshigindegi qymbat saıajaıdy ıelenip alýyna qatysty. Tergeý V.Merabıshvılıdiń bul saıajaıdy 2009 jyly kúshpen tartyp alyp, 2013 jylǵa deıin paıdalanǵanyn dáleldedi.
V.Merabıshvılımen birge Z.Chıaberashvılı de ustaldy. Taǵylǵan aıyptar boıynsha olarǵa jeti jyldan on eki jylǵa deıingi merzimde bas bostandyǵynan aıyrý jazasy berilýi múmkin.
Prokýratýra, sondaı-aq, 2012 jylǵy 26 mamyrdaǵy ereýildi kúshpen taratý jáne bankır Sandro Gırgvlıanıdi óltirý jónindegi isterdiń aıaqtalaıyn dep qalǵanyn málimdedi. Bul isterge de sol kezde eldiń Іshki ister mınıstri bolǵan Vano Merabıshvılıdiń kináliligi dáleldengen.
Prokýratýra sottan bultartpaý sharasy retinde V.Merabıshvılıdi tutqynǵa alýdy taǵaıyndaýdy suraıdy.
