Grýzııada el prezıdentine ımpıchment jarııalaý protsedýrasyn bastaýǵa ruqsat berildi

Grýzııanyń Konstıtýtsııalyq soty el prezıdenti Salome Zýrabıshvılıge ımpıchment jarııalaý protsedýrasyn bastaýǵa ruqsat berdi. Kazinform bul týraly VVS-ge silteme jasap habarlaıdy.

Grýzııa tarıhynda buryn-sońdy bolmaǵan prezıdentke ımpıchment jarııalaý isin 9 sýdıa úsh kún boıy qarady. Sheshim qabyldaý úshin olardyń kem degende altaýynyń kelisimi qajet boldy.

Sot sheshimin oqyǵan Konstıtýtsııalyq sot tóraǵasy Merab Týrav atap ótkendeı, prezıdent shetelge úsh ret sapary kezinde úkimettiń kelisiminsiz halyqaralyq qatynastar salasyndaǵy ókilettigin júzege asyryp, sol arqyly Konstıtýtsııanyń 52-babyn buzdy.

Bul – Konstıtýtsııalyq sottyń túpkilikti jáne shaǵymdanýǵa nemese qaıta qaraýǵa jatpaıtyn qorytyndysy.

Eldiń basqarýshy partııasy ımpıchment máselesi boıynsha sotqa bir aı buryn júgingen bolatyn.

Tájirıbeli dıplomat, Frantsııanyń týmasy Salome Zýrabıshvılı 2018 jyly Grýzııadaǵy prezıdent saılaýynda jeńiske jetken edi. Ol – táýelsiz Grýzııa tarıhyndaǵy tuńǵysh áıel prezıdent.

Buǵan deıin «Grýzııa armany» basqarýshy partııasy is basyndaǵy prezıdentke ımpıchment jarııalaý bastamasyn kótergenin jazǵan bolatynbyz.