Grýzııada eks-prezıdent Saakashvılıdiń partııasyna tyıym salý máselesi qaralady

ASTANA. KAZINFORM – Qazan aıynda Grýzııanyń Konstıtýtsııalyq sotyna «Birtutas ulttyq qozǵalystyń» qyzmetin Konstıtýtsııaǵa qaıshy dep taný jóninde talap-aryz joldanady, dep habarlaıdy Kazinform.

Premer-mınıstr Iraklıı Kobahıdze bul qadam eldegi turaqtylyq pen quqyqtyq tártipti nyǵaıtýǵa baǵyttalǵan demokratııalyq ári zańdy protsess ekenin atap ótti.

«Qazanda Konstıtýtsııalyq sotqa «Ulttyq qozǵalys» dep atalatyn barlyq partııanyń qyzmetin Konstıtýtsııaǵa qaıshy dep taný týraly talap-aryz beriledi. Bul – demokratııalyq protsess jáne bul talap-aryz sotqa mindetti túrde joldanady», – dedi ol.

Bastamany parlamenttegi kópshilik pen «Grýzın armany» partııasy qoldap otyr. Ýaqytsha tergeý komıssııasynyń tóraıymy Tea Tsýlýkıanı komıssııa jumysynyń qorytyndylary partııanyń saıası qyzmetin shekteýge quqyqtyq negiz bolǵanyn málimdedi.

Onyń aıtýynsha, bul partııanyń áreketteri Grýzııanyń konstıtýtsııalyq qurylymy men ulttyq qaýipsizdigine qaıshy keledi.

Grýzııa bıligi mundaı qadam eldiń egemendigin qorǵaý, ishki qaýipsizdikke tóngen qaterlerdi joıý jáne demokratııalyq ınstıtýttardy nyǵaıtý úshin qajet ekenin alǵa tartýda. «Grýzın armany» men parlamenttik kópshilik bul sheshimdi qoǵamdyq tártip pen eldiń turaqty damýyn saqtap qalý úshin qajetti shara retinde baǵalaıdy.

Jaqyn kúnderi Konstıtýtsııalyq sotqa túsken talap-aryz qarala bastaıdy dep kútilýde. Bılik ókilderi azamattardy sabyr saqtap, qabyldanyp jatqan sharalardyń memleket pen qoǵam múddesin qorǵaýǵa ǵana baǵyttalǵanyna senimdi bolýǵa shaqyrdy.

Buǵan deıin Grýzııa bıligi 4 qazanda ótetin mýnıtsıpaldyq saılaýlarǵa qatysatyn partııalardy tirkeýdi aıaqtaǵan bolatyn.