Grýzııada balalardyń elektrosamokat tebý tártibi ózgerýi múmkin
ASTANA. KAZINFORM — Grýzııada kámeletke tolmaǵandardyń elektrosamokat paıdalanýyn quqyqtyq turǵydan retteý josparlanyp otyr, dep habarlaıdy Kazinform agenttigi Georgia Today basylymyna silteme jasap.
Basylymnyń málimetinshe, bul shara Grýzııa úkimetiniń Parlamenttiń 2026 jylǵy kúzgi sessııasyna arnalǵan qysqa merzimdi zań shyǵarý josparyna engizilgen.
Bılik eki dóńgelekti elektrosamokattardy paıdalanýǵa baılanysty qaýip-qaterdi azaıtýǵa, jol qozǵalysyna qatysýshylardy qorǵaýǵa jáne jol qaýipsizdigin arttyrýǵa baǵyttalǵan zań jobasyn ázirlep, Parlamentke usynýdy josparlap otyr.
Bul másele Grýzııanyń 2026–2030 jyldarǵa arnalǵan jol qaýipsizdigi jónindegi ulttyq strategııasy men 2026–2027 jyldarǵa arnalǵan is-qımyl josparyna da engizilgen.
Atalǵan qujattarǵa sáıkes, úkimet mototsıklder, mopedter men elektrosamokattardy qaýipsiz paıdalanýdy retteıtin qoldanystaǵy zańnamany qaıta qaraýdy kózdep otyr.
Sonymen qatar basylymda kámeletke tolmaǵandarǵa qatysty naqty qandaı shekteýler engiziletini ázirge aıtylmaǵan.
Buǵan deıin Qazaqstanda 25 tamyzdan bastap elektrosamokattardyń trotýarmen júrýine tyıym salynatyny habarlandy.
Sondaı-aq Almatyda túngi ýaqytta samokat aıdaǵan er adam odan qulap qaza tapqany belgili boldy.
