Grýzııada alty jyldan asqan avtokólikterdi ımporttaýǵa tyıym salynbaq
ASTANA. KAZINFORM – Grýzııada qoljanysta bolǵanyna alty jyldan asqan avtokólikterdi elge ákelýge tyıym salynbaq. Tıisti zań jobasy parlamentke engizildi. Bul týraly Premer-mınıstr Iraklıı Kobahıdze úkimet otyrysynda málimdedi, dep habarlaıdy Kazinform agenttiginiń menshikti tilshisi.
Kobahıdzeniń aıtýynsha, bastama eldegi kólik sanynyń kúrt artýymen baılanysty.
— 2012 jyly Grýzııada 864 myń avtokólik tirkelgen bolsa, bıylǵy derekter boıynsha bul kórsetkish eki mıllıonnan asty. Ósimniń qanshalyqty aýqymdy ekeni anyq. Avtokólikter sanynyń mundaı kóbeıýi bir jaǵynan jol qozǵalysynyń shamadan tys júktelýine, ekinshi jaǵynan ekologııalyq jaǵdaıdyń nasharlaýyna ákeledi. Sondyqtan tıisti sharalar qabyldaý qajet dep sanaımyz, — dedi premer-mınıstr.
Shekteýler ekologııalyq jaǵdaıdy jaqsartýǵa, azamattardyń densaýlyǵyn qorǵaýǵa jáne qozǵalys jaılylyǵyn arttyrýǵa kómektesedi. Zań jobasynda jekelegen erekshelikter qarastyrylǵan, alaıda olardyń egjeı-tegjeıi ázirge jarııalanǵan joq.
Aıta keteıik, Grýzııada avtokólikterdi ımporttaý men tirkeýge qatysty shekteýler qazirdiń ózinde qoldanysta. 2024 jylǵy 1 qańtardan bastap ekologııalyq «Eýro-5» standartyna kóshýge baılanysty 2013 jylǵa deıin shyǵarylǵan jeńil avtokólikterdi elge ákelýge jáne tirkeýge tyıym salyndy. Tek qaıta eksportqa nemese tranzıtke arnalǵan, tirkeý quqyǵynsyz kólikterge ǵana ruqsat berilgen. 2025 jylǵy 1 qańtardan bastap osyndaı shekteýler qoldanysta bolǵanyna 10 jyldan asqan júk kólikteri men avtobýstarǵa da engizildi.
Jeltoqsan aıynda Qazaqstan Grýzııadan ımporttalǵan avtokólikter sany boıynsha birinshi orynǵa shyqqany habarlanǵan edi.
Eske salsaq Grýzııada plastıkalyq bótelkelerge tyıym salynatyny týraly jazǵan edik.
