Grýzııada 2024 jylǵy halyq sanaǵynyń qorytyndylary jarııalandy
ASTANA.KAZINFORM — Grýzııanyń Ulttyq statıstıka qyzmeti (GeoStat) 2024 jylǵy halyq sanaǵynyń resmı qorytyndylaryn jarııalady.
Esepke sáıkes, el halqynyń sany 3,93 mln adam. Bul 2014 jylǵy halyq sanaǵynyń kórsetkishinen 5,8 paıyzǵa joǵary, dep habarlaıdy Kazinform agenttiginiń óńirdegi menshikti tilshisi.
Jarııalanǵan málimetterge sáıkes, elde ýrbanızatsııa deńgeıiniń ósýi jalǵasyp jatyr. Qalalarda halyqtyń 62,5 paıyzy tursa, aýyl turǵyndarynyń úlesi 37,5 paıyz.
Halyq sanynyń eń aıtarlyqtaı ósimi Tbılısı qalasynda tirkeldi. Munda turǵyndar sany 1,33 mln adamǵa jetip, sońǵy on jylda 20 paıyzǵa artqan. Sondaı-aq Batýmı qalasynda da eleýli ósim baıqalyp, halyq sany 54 paıyzǵa kóbeıgen.
Astanadan bólek, Adjarııa men Kvemo Kartlı aımaqtarynda halyq sanynyń artýy tirkeldi. Al eldiń basqa óńirleriniń basym bóliginde halyq sanynyń azaıý úrdisi saqtalyp otyr.
Halyq sanaǵynyń qorytyndysy boıynsha, sońǵy on jylda Grýzııa azamattarynyń sany 2,5 paıyzǵa nemese shamamen 91 myń adamǵa artqan.
El halqynyń 96,1 paıyzy nemese 3,77 mln adam – Grýzııa azamattary. Turaqty turatyn sheteldik azamattardyń sany shamamen 134 myń adamdy quraıdy. Olardyń ishinde Reseı, Úndistan, Ýkraına, Ázerbaıjan jáne Armenııa azamattary eń úlken topty quraıdy.
Etnıkalyq qurylymda halyqtyń 84,1 paıyzy grýzınder. Ekinshi orynda – ázerbaıjandar, olardyń sany 268,8 myń adam nemese el halqynyń 6,8 paıyzy. Úshinshi orynda armıandar ornalasqan, olardyń úlesi 4,3 paıyz.
Jarııalanǵan derekter el halqynyń iri qalalarda shoǵyrlanýy jalǵasyp jatqanyn jáne birqatar óńirde demografııalyq qysqarý úrdisiniń saqtalǵanyn kórsetedi.
Aıta ketelik Grýzııa ımmıgratsııalyq erejelerdi qatańdatatyny týraly jazǵan edik.
