Grýzııada 1 shildeden bastap úı janýarlaryn ósirýdiń jańa erejeleri kúshine endi
ASTANA. KAZINFORM — Jańa zańǵa sáıkes, asyl tuqymdyǵa jatpaıtyn ıtter men mysyqtardy ósirýge tyıym salynyp, asyl tuqymdy janýar ıeleri úshin mindetti ruqsat alý júıesi engizildi, dep habarlaıdy Kazinform agenttiginiń óńirdegi menshikti tilshisi.
Jańa talaptarǵa sáıkes, asyl tuqymdy ıtter men mysyqtardy ósirýge beriletin ruqsat eki jyl merzimge rásimdeledi. Qajet bolǵan jaǵdaıda ony taǵy bir jylǵa uzartýǵa bolady. Belgilengen merzim aıaqtalǵannan keıin janýarlar mindetti túrde sterılızatsııadan nemese kastratsııadan ótkizilýi tıis.
Resmı kórmelerge qatysatyn janýarlarǵa ǵana bul talap qoldanylmaıdy. Mundaı ıtter men mysyqtardyń ıeleri olardy arnaıy memlekettik derekqorǵa tirkeýge mindetti. Eger tirkelgennen keıin eki jyl ishinde janýardyń kórmelerge qatysqanyn rastaıtyn qujat usynylmasa, ol da mindetti sterılızatsııadan ótkiziledi.
Zańǵa sáıkes, janýarlardy asyldandyrý maqsatynda shaǵylystyrýdyń eń tómengi jasy belgilengen. Urǵashy ıtterdi – 17 aıdan, erkek ıtterdi – 12 aıdan, al mysyqtardy – 12 aıdan bastap shaǵylystyrýǵa bolady.
Sonymen qatar, belgili bir jastan asqan janýarlardy kóbeıtý (shaǵylystyrý) maqsatynda paıdalanýǵa tyıym salynady. Atap aıtqanda, ıtter úshin shekti jas – 9 jyl, urǵashy mysyqtar úshin – 7 jyl, erkek mysyqtar úshin – 9 jyl.
Budan bólek, janýarlardy jylyna bir retten artyq shaǵylystyrýǵa bolmaıdy.
Jańa talaptardy buzǵandarǵa 3 myń ları (shamamen 1,1 myń AQSh dollary) kóleminde aıyppul qarastyrylǵan.
Sondaı-aq Úkimettiń jeke sheshimimen áleýetti qaýipti dep tanylǵan birqatar ıt tuqymdaryn ósirýge úsh jyldyq moratorıı engizildi. Tizimge pıtbýlterer, staffordshır tereri, argentınalyq dog, kane-korso jáne basqa da tuqymdar engen.
Budan bólek, sońǵy jyldary Grýzııada sany aıtarlyqtaı kóbeıgen haskı, malamýt jáne laıka sııaqty tanymal ıt tuqymdaryn ósirýge de ýaqytsha tyıym salyndy.
1 shildeden bastap qosymsha shekteýler Tbılısıde de kúshine endi. Tbılısı sakrebýlosynyń sheshimine sáıkes, pıtomnık nemese janýarlar panasy mártebesi joq azamattarǵa bir páterde nemese bir jer teliminde bes úı janýarynan artyq ustaýǵa tyıym salynady.
Jańa erejelerge sáıkes, úı janýarynyń resmı ıesi retinde 16 jastan bastap tirkelýge bolady. Al qaýipti tuqymdaǵy ıtterdi tirkeý úshin psıhıkalyq densaýlyq týraly medıtsınalyq anyqtama usyný mindetteledi.
Buǵan deıin Grýzııa azamattarynyń jubaılaryna arnalǵan yqtııarhattyń jańa sanatyn engizetinin jazǵan bolatynbyz.
