Grýzııada 1 sáýirden bastap birrettik plastık ydystardy satýǵa tyıym salyndy
ASTANA. KAZINFORM — 2026 jylǵy 1 sáýirden bastap Grýzııa aýmaǵynda birrettik plastık ydys pen taǵamǵa arnalǵan konteınerlerdi satýǵa tolyq tyıym kúshine endi, dep habarlaıdy Kazinform agenttiginiń menshikti tilshisi.
Úkimet qaýlysyna sáıkes, tyıym plastık shanyshqy, pyshaq, qasyq, taıaqsha, tárelke, tútikshe men aralastyrǵyshtarǵa qatysty. Sondaı-aq kóbiktengen polıstıroldan jasalǵan taǵam konteınerleri, staqan men qaqpaqtar da shekteýge engizildi.
Buǵan deıin mundaı ónimderdi óndirý men ımporttaýǵa 2026 jylǵy 1 qańtardan bastap tyıym salynǵan bolatyn. Alaıda kásipkerlerge qoımadaǵy taýarlardy ótkizý úshin úsh aılyq ótpeli kezeń berilgen edi.
Grýzııanyń Qorshaǵan ortany qorǵaý jáne aýyl sharýashylyǵy mınıstrligi málimetinshe, búginnen bastap memlekettik satyp alý salasyna da qosymsha shekteýler engizildi.
Endi bıýdjettik uıymdarǵa plastık staqan, konteıner jáne kólemi úsh lıtrge deıingi plastık qutydaǵy sýsyndardy satyp alýǵa tyıym salynady. Bul talap tek qorǵanys salasy men áskerı qyzmetshilerdi qamtamasyz etýge arnalǵan satyp alýlarǵa qoldanylmaıdy.
Belgilengen talaptardy buzǵany úshin 1000 ları (shamamen 370 dollar) kóleminde aıyppul salynyp, taýar tárkilenedi. Qaıtalanǵan jaǵdaıda aıyppul 2000 larıge (740 dollar) deıin ósedi jáne ónim qaıtadan tárkilenedi.
Mınıstrlik bul shekteýler tek eksportqa arnalǵan plastık ónimderiniń óndirisine qatysty emes ekenin naqtylady. Atalǵan sharalar plastık tutynýdy azaıtyp, eldegi ekologııalyq jaǵdaıdy jaqsartýǵa baǵyttalǵan.
Buǵan deıin Grýzııada alty jyldan asqan avtokólikterdi ımporttaýǵa tyıym salý josparlanyp otyrǵany habarlanǵan edi.
