Grýzııa júrgizýshilerine kólikti qujatsyz aıdaýǵa ruqsat etildi
ASTANA. 30 qyrkúıek. QazAqparat - Grýzııanyń Іshki ister mınıstrligi júrgizýshi kýáligi men avtokóliktiń tehnıkalyq pasportyn birge alyp júrý mindetin alyp tastady. Bul jóninde búgin Tbılısıde brıfıng barysynda Grýzııa ІІM basshysy Vano Merabıshvılı málimdedi.
«Bul - bizdiń azamattarymyzdyń ómiri men olardyń Grýzııa aýmaǵy boıynsha erkin júrip-turýyn jeńildetýge baǵyttalǵan jańalyǵymyz», - degen ІІM basshysynyń sózin mysalǵa keltirdi AutoNews.
Júrgizýshiniń kýáligi men tehpasporty jaıly málimetterdi jol polıtsııasy ІІM biryńǵaı kompıýterlik jelisi arqyly tekseretin bolady.
Portaldyń eskerip ótkenindeı, búginge deıin Grýzııa polıtsııasy kýáligin kórsetpegen júrgizýshilerge 15 ları (shamamen 10 dollar) kóleminde aıyppul salyp kelgen. Sondaı-aq umytshaq júrgizýshilerdiń avtokóligi mindetti túrde aıyp alańyna turǵyzylatyn.
