Grýzııa jylyna 20 mln jolaýshyny qabyldaı alatyn eń iri halyqaralyq áýejaıyn ashady
ASTANA. KAZINFORM — Halyqaralyq áýejaı 2031 jylǵa qaraı Vazıanıde ashylady jáne Grýzııanyń jańa avıatsııalyq habyna aınalady, dep habarlaıdy Kazinform.
Grýzııanyń ekonomıka jáne turaqty damý mınıstriniń orynbasary Tamar Ioselıanıdiń aıtýynsha, qazirgi Tbılısı halyqaralyq áýejaıy jańa nysan paıdalanýǵa berilgennen keıin jumysyn toqtatady.
Jańa áýejaı salý týraly sheshim jolaýshylar aǵynynyń artýyna jáne qoldanystaǵy Tbılısı áýejaıynyń keńeıtý múmkindiginiń shekteýli bolýyna baılanysty qabyldandy.
— Vazıanı áýejaıy 2031 jyldyń sońyna qaraı paıdalanýǵa beriledi. Onyń syıymdylyǵy qazirgi Tbılısı áýejaıynan tórt joǵary bolady, bul jylyna 20 mln deıin jolaýshyǵa qyzmet kórsetýge múmkindik beredi, — dep atap ótti mınıstr orynbasary.
Jańa áýejaı halyqaralyq qaýipsizdik jáne qyzmet kórsetý standarttaryna saı keletin zamanaýı halyqaralyq avıatsııa haby retinde jobalanyp otyr. Úkimet jeke ınvestorlardy tartý múmkindigin qarastyryp otyr, bul rette aktsııalardyń baqylaý paketin memleket saqtaıdy.
Sondaı-aq, Grýzııa úkimeti qazirgi ýaqytta Tbılısıdiń qoldanystaǵy áýejaıyn keńeıtý jobasyn júzege asyryp jatqany týraly habarlandy. Aldaǵy eki jylda onyń ótkizý qabileti jylyna 10 mln jolaýshyǵa deıin, al termınaldar aýmaǵy 50 paıyzǵa artady. Investıtsııalar kólemi 150 mln AQSh dollar.
Ekonomıka mınıstrliginiń málimetinshe, qazirgi ýaqytta Grýzııaǵa 125 tikeleı reıs qyzmet kórsetedi, naryqta 77 áýe kompanııasy jumys istep jatyr. 2025 jyly Tbılısı, Kýtaısı jáne Batýmı áýejaılary 8,5 mln jolaýshyǵa qyzmet kórsetti, bul rekordtyq kórsetkish boldy.
— Biz uzaq merzimdi maqsattar men naqty suranysqa negizdep eldiń barlyq áýejaılaryn — Tbılısı, Kýtaısı jáne Batýmıdi birtindep damytyp kelemiz. Vazıanı halyqaralyq áýejaıynyń ashylýy Grýzııanyń aımaqtyq kólik jáne tranzıttik hab retindegi rólin nyǵaıtýdaǵy mańyzdy qadam bolmaq, — dep atap ótti Tamar Ioselıanı.
Buǵan deıin Tbılısıdegi jańa halyqaralyq áýejaı qashan paıdalanýǵa beriletinin jazǵan bolatynbyz.
Eske sala ketsek, jeltoqsanda Grýzııa úkimeti Tbılısıdegi Arsenalı tóbesinde úlken ákimshilik qala salý jobasyn jarııalady.
2026 jyly elimizde qandaı jańa áýejaılar men reıster paıda bolatynyn myna materıaldan oqı alasyz.