Grýzııa úsh oppozıtsııalyq partııa qyzmetine tyıym salýdy talap etti

ASTANA. KAZINFORM – Grýzııanyń «Grýzın armany» bıleýshi partııasy Konstıtýtsııalyq sotqa úsh oppozıtsııalyq saıası birlestiktiń qyzmetin konstıtýtsııaǵa qaıshy dep tanýdy jáne tyıym salýdy talap etip, sotqa shaǵym túsirdi, dep habarlaıdy Interpressnews. 

Bul týraly Parlament spıkeri Shalva Papýashvılı Tbılısıde ótken baspasóz máslıhatynda málimdedi. 

- Biz Konstıtýtsııalyq sotqa úsh partııany konstıtýtsııaǵa qaıshy dep tanýdy jáne is júzinde birtutas uıym retinde jumys isteıtin qyzmetine tyıym salýdy surap ótinish bildirip otyrmyz. Másele «Birlik – Ulttyq qozǵalys», «Ózgerister koalıtsııasy» jáne «Kúshti Grýzııa – Lelo, Halyq úshin, Bostandyq úshin» azamattyq birlestikter týraly bolyp otyr, - dedi Papýashvılı.

Ol sondaı-aq atalǵan partııalarmen basqa da saıası qurylymdar, atap aıtqanda «Elene Hoshtarııa - Droa», «Gırchı - kóbirek bostandyq», «Eýropa úshin - Qurylysshy strategııasy», «Eýropalyq Grýzııa - bostandyq qozǵalysy», «Federalıstik partııa» jáne «Grýzııanyń Respýblıkalyq partııasymen» tyǵyz baılanysty ekenin atap ótti.

Alaıda, Papýashvılıdiń aıtýynsha, olarǵa tyıym salý qazirgi ýaqytta qarastyrylyp otyrǵan joq, sebebi saıası yqpaly jetkiliksiz jáne konstıtýtsııalyq tártipke eshqandaı qaýip tóndirmeıdi.

Parlament basshysy sot isin daıyndaý kezinde eki negizgi krıterıı qoldanylǵanyn túsindirdi: partııanyń qyzmetin konstıtýtsııaǵa qaıshy dep tanýdyń zańdy negizdemesi jáne onyń sanyna, uıymdastyrýshylyq qurylymyna jáne saıası yqpalyna negizdelgen konstıtýtsııalyq tártipke yqtımal qaýip deńgeıi.

- Halyqaralyq tájirıbe kórsetkendeı, partııaǵa tyıym salý úshin onyń konstıtýtsııaǵa qaıshy rıtorıkasy jetkiliksiz ekenin kórsetip otyr. Onyń konstıtýtsııalyq tártipke qaýip tóndiretin shynaıy áleýetin dáleldeý qajet. Biz Konstıtýtsııalyq sotqa ótinishimizdi osy krıterıılerge súıene otyryp daıyndadyq, - dep atap ótti Shalva Papýashvılı.

Eger Konstıtýtsııalyq sot «Grýzın armany» partııasynyń paıdasyna sheshim shyǵarsa, atalǵan partııalardyń jetekshileri men músheleri saılaýǵa qatysý, memlekettik qyzmette bolý jáne jańa saıası partııalardy tirkeý quqyǵynan aıyrylýy múmkin. 

Grýzın BAQ-tarynyń habarlaýynsha, sottyń bul tanymal is boıynsha sheshimi aldaǵy aılarda shyǵady dep kútilip otyr. 

Buǵan deıin Grýzııanyń eks-prezıdenti Tbılısıdegi úkimetke qarsy mıtıngke qatysqanyn jazǵan bolatynbyz.