Grýzııa úkimetiniń jańa quramy men baǵdarlamasy Parlamentke usynyldy
ASTANA. KAZINFORM - «Eýropa memleketin qurý úshin». Osyndaı ataýmen bolashaq premer-mınıstr Iraklıı Kobahıdze basqaratyn jańa úkimettiń quramy men úkimet baǵdarlamasy Grýzııa Parlamentine tapsyryldy. Bul týraly «Novostı-Grýzııa» jazdy.
Grýzııa parlamentiniń kóktemgi sessııasy kelesi aptada ashylady. Premer-mınıstr aýysqandyqtan, parlament úkimetke senim bildirýi kerek. Onyń aldynda komıtetterde, fraktsııalar men saıası toptarda talqylaý ótedi. Senim bildirý úshin parlamenttik kópshilik daýys jetkilikti, 150 daýystyń 76 daýysy qajet.
«Úkimettik baǵdarlama elimizdiń taıaý jyldardaǵy ulttyq, óńirlik jáne jahandyq deńgeıde qarqyndy damýy úshin berik negiz jasaıdy. Bizdi Eýropalyq Odaqqa kirý tarıhı maqsatqa jaqyndatady jáne árbir azamattyń jarqyn bolashaǵyna qyzmet etedi», – delingen qujatta.
Grýzııa úkimetiniń jańa quramy Iraklıı Garıbashvılı premer-mınıstr qyzmetinen ketken soń jasaqtaldy. Ol Iraklıı Kobahıdzeniń ornyna bıliktegi «Grýzın armany» partııasynyń tóraǵasy laýazymyn atqarady.
Bılik partııasynan Grýzııa premer-mınıstri laýazymyna kandıdattardy usyný quqyǵy onyń negizin qalaýshy, mıllıarder Bıdzına Ivanıshvılıge berildi. Ol ótken jyldyń sońynda saıasatqa resmı túrde oralyp, «Grýzın armanynyń» qurmetti tóraǵasy boldy.
Grýzııanyń jańa úkimetinde premer-mınıstrden basqa bir ǵana aýysý bolady eldiń qorǵanys mınıstri Djýansher Býrchýladze qyzmetinen ketedi. Onyń ornyna depýtat Iraklıı Chıkovanıdiń kandıdatýrasy usynyldy, bul úshin ol depýtattyq ókilettigin toqtatýy tıis.
