Grýzııa túrmesindegi zorlyq-zombylyqtar týraly vıdeonyń avtory kepildikpen bosatyldy
ASTANA. 21 qańtar. QazAqparat - Tbılısı qalalyq soty sottalýshylarǵa kórsetilgen zorlyq-zombylyqtar týraly vıdeonyń avtory, Gldansk túrmesiniń burynǵy qyzmetkeri Vladımır Bedýkadzeni kepildikpen shyǵarý sheshimin qabyldady.
Bul týraly ITAR-TASS habarlady.
Kepildikke bosatý týraly sheshimdi sot tergeýdiń ótinimhaty negizinde qabyldady. Eki myń ları kólemindegi (1200 dollarǵa jýyq) kepil somany Bedýkadze 10 kúnniń ishinde engizýi tıis.
Bedýkadze bosatylǵannan keıin tergeýmen birge jumys isteýge ázir ekendigin jáne óziniń kinásizdigin málim etti.
Eske sala ıyq, Gldansktiń №8-inshi túrmesinde sottalýshylarǵa kórsetilip otyrǵan zombylyqtar týraly vıdeo 2012 jyldyń qyrkúıek aıynda Grýzııanyń oppozıtsııalyq telearnalarynda kórsetilgen bolatyn. Olardyń jarııalanýy saıası daý-damaı týyndatyp, eki mınıstrdiń otstavkasyna alyp keldi. Bul eldegi parlamenttik saılaýlar aldynda el bıligi úshin teris áserin tıgizdi.
BAQ-tarda beınejazbalardyń avtory atalǵan Bedýkadze olar túsirilgen kezde túrmede jumys istegen, jáne azaptaýlarǵa qatysýy da múmkin. Jazbalar efırde jarııalanyp jatqanda ol Belgııada saıası baspana alýǵa tyrysyp jatty. El bıligi ony halyqaralyq izdeýge jarııalady, prokýratýra oǵan azaptaýlar úshin syrttaı aıyp taqty, al sot ekiaılyq merzimge qamaýǵa alýǵa aldyn ala úkim shyǵardy.
«Grýzııa armany» oppozıtsııalyq qozǵalysy jeńiske jetken parlamenttik saılaýlardan keıin jáne el úkimeti aýysqannan soń Bedýkadzeni izdeý toqtatyldy. Soǵan qaramastan, ol 18 qańtar kúni Grýzııaǵa oralǵan kúni Tbılısıdiń áýejaıynda tutqynǵa alyndy.
