Grýzııa týrızmi qarqyn alyp keledi: tabys 1,3 mlrd dollardan asty

ASTANA. KAZINFORM — 2025 jyldyń ekinshi toqsanynda Grýzııaǵa 1,8 mıllıon sheteldik azamat kelgen. Bul kórsetkish ótken jyldyń sáıkes kezeńimen salystyrǵanda 6,9 paıyzǵa joǵary, dep habarlaıdy 1TV.ge portaly.

Ulttyq statıstıka qyzmetiniń málimetinshe, týrıstik saparlardan túsken tabys 3,5 mıllıard larıǵa (1,295 mlrd AQSh dollary) jetken. Bul ótken jylmen salystyrǵanda 0,6 paıyzǵa artyq.

Kelýshilerdiń basym bóligin 31-50 jas aralyǵyndaǵy azamattar quraǵan – 44,2 paıyz. Áıelderdiń úlesi – 41,8 paıyz.

Týrıstik saparlardyń 80,1 paıyzy uzaqmerzimdi demalysqa arnalǵan, 15,8 paıyzy – birkúndik, al 4,2 paıyzy aralas sıpatta bolǵan.

Eń kóp týrıster kelgen elder qatarynda:

• Reseı – 309,4 myń adam (22,4%),
• Túrkııa – 242,9 myń (17,6%),
• Armenııa – 148,9 myń (10,8%).

Eń tanymal baǵyttar – Tbılısı (928 myń týrıst) jáne Adjarııa avtonomııalyq respýblıkasy (629 myńnan astam).

Saparlardyń 49,4 paıyzynyń negizgi maqsaty demalys jáne oıyn-saýyq bolǵan. Ortasha sapar uzaqtyǵy 5,3 túnge deıin ulǵaıǵan.

Aıta keterligi, týrıstik saparlardyń 78,1 paıyzy – qaıtalanǵan, bul Grýzııanyń sheteldik týrıster úshin tartymdylyǵynyń joǵary ekenin kórsetedi.

Sonymen qatar, jalpy shyǵyn kóleminiń ósýine qaramastan, bir týrıstke shaqqandaǵy ortasha shyǵyn 6 paıyzǵa azaıyp, 2 116,8 larıdi (shamamen 784 dollar) quraǵan.

Buǵan deıin 2025 jyldyń alǵashqy jartyjyldyǵynda Grýzııa halyqaralyq týrızmnen 2 mlrd dollar tabys tapqany habarlanǵan bolatyn.