Grýzııa turǵyndary shetelge jıi shyǵyp, shyǵynyn edáýir arttyrǵan
ASTANA. KAZINFORM — Grýzııa turǵyndary 2026 jyldyń ekinshi toqsanynda shetelge 740,9 myń sapar jasaǵan. Bul ótken jyldyń sáıkes kezeńimen salystyrǵanda 3,6 paıyzǵa kóp. Bul týraly Kazinform agenttiginiń óńirdegi menshikti tilshisi Grýzııa Ulttyq statıstıka qyzmetiniń (GeoStat) derekterine silteme jasap habarlady.
Sonymen qatar grýzınder úshin shetelge shyǵý qymbattaı túsken. Saparǵa jumsalǵan shyǵyn 18 paıyzǵa jýyq ósken. Onyń eń úlken bóligi qonaqúıge nemese kólikke emes, saýda jasaýǵa jumsalǵan.
GeoStat málimetinshe, 15 jastan asqan Grýzııa turǵyndarynyń shetelge jasaǵan saparlarynyń sany 571,9 myńdy qurap, bir jyl ishinde 1,4 paıyzǵa artqan.
Shetelge shyǵatyn grýzınderdiń negizgi baǵyty burynǵydaı kórshiles elder bolyp otyr. Birinshi orynda Túrkııa — 201,1 myń sapar, ekinshi orynda Armenııa — 112,9 myń sapar. Eýropalyq odaq elderine saparlardyń 19,7 paıyzy, Reseıge — 10,7 paıyzy, Ázerbaıjanǵa 1,7 paıyzy tıesili.
Saparlardyń maqsatyna nazar aýdarsaq, Grýzııa turǵyndarynyń shetelge shyǵýy tek demalyspen shektelmeıdi. Saparlardyń shamamen 35 paıyzy dostary men týystaryna barýǵa, 31,1 paıyzy saýda jasaýǵa, 21 paıyzy demalys pen rekreatsııaǵa tıesili. Іskerlik saparlardyń úlesi — 8,7 paıyz, medıtsınalyq maqsattaǵy saparlar — 2,7 paıyz.
Osy tusta saıahatshylar shyǵynynyń ósýi erekshe baıqalady. Úsh aı ishinde Grýzııa turǵyndary shetelde 260,9 mıllıon dollar jumsaǵan. Bul 2025 jyldyń ekinshi toqsanymen salystyrǵanda 17,6 paıyzǵa kóp. Bir saparǵa jumsalatyn ortasha shyǵyn 16,1 paıyzǵa ósip, shamamen 456 dollarǵa jetken.
Saıahatshylardyń saýdaǵa jumsaǵan qarajaty 93,3 mıllıon dollarǵa jýyqtaǵan. Bul barlyq shyǵynnyń 35,8 paıyzy. Tamaq pen sýsynǵa 70,2 mıllıon dollar, turýǵa 37,8 mıllıon dollar, jergilikti kólikke 29,2 mıllıon dollar jumsalǵan. Al demalys, mádenı jáne sporttyq is-sharalarǵa shamamen 12,4 mıllıon dollar ketken.
Osylaısha, Grýzııadan shyǵatyn týrıstik aǵynnyń ósýi sapar sanynyń kúrt artýymen emes, saıahatshylar shyǵynynyń ulǵaıýymen sıpattalady. Sapar sany 3,6 paıyzǵa artsa, shyǵyn kólemi odan bes esege jýyq joǵary qarqynmen, ıaǵnı 17,6 paıyzǵa ósken.
Buǵan deıin Grýzııanyń alty aıda halyqaralyq týrızmnen 1,93 mıllıard dollar kiris alǵany habarlanǵan bolatyn.
Sonymen qatar 2026 jyldyń birinshi jartyjyldyǵynda Qazaqstan Grýzııaǵa eń kóp týrıst jibergen alǵashqy on eldiń qataryna kirdi.
Sondaı-aq, bıyl Grýzııaǵa barǵan qazaqstandyq týrıster sany artqany belgili.
