Grýzııa Tbılısıdegi Arsenalı tóbesinde jańa úkimettik qala salmaq

ASTANA. KAZINFORM – Grýzııa úkimeti Tbılısıdegi Arsenalı tóbesinde úlken ákimshilik qala salý jobasyn jarııalady. Joba aıasynda memlekettik organdardyń basym bóligi jańa keshenge kóshiriledi, dep habarlaıdy Business Media.

Úkimettiń josparyna sáıkes, Arsenalı tóbesindegi 77 gektar aýmaqta jańa ákimshilik ortalyq salynady. Munda Grýzııanyń negizgi memlekettik mekemeleri – mınıstrlikter, elordanyń merııasy, Úkimet apparaty jáne Parlament ǵımaraty shoǵyrlanatyn bolady.

Premer-mınıstr Iraklıı Kobahıdze jobany ishinara qarjylandyrý maqsatynda qazirgi mınıstrlik ǵımarattarynyń bir bóligi satylýy múmkin ekenin aıtty.

«Bul jobany iske asyrý ákimshilik ınfraqurylymdy jańartýǵa ǵana emes, qurylys jáne ınvestıtsııalyq sektorlardaǵy ekonomıkalyq belsendilikti arttyrýǵa da múmkindik beredi», – dedi Grýzııa Úkimetiniń basshysy.

Alǵashqyda qurylys alańy retinde Ortachala aýdany qarastyrylǵan, alaıda keıin memleket menshigindegi eń iri jer telimderiniń biri – Arsenalı tóbesi tańdaldy.

Joba 282 750 sharshy metr jańa keńse jáne ákimshilik orynjaılardy qamtıdy. Onyń ishinde sharalar ótkizýge arnalǵan keminde 10 000 sharshy metr aýmaq qarastyrylǵan.

Jospar boıynsha jańa keshenge:

• Tbılısı merııasy (59 900 m²),

• Parlament ǵımaraty (31 350 m²),

• sondaı-aq birqatar mınıstrlikterdiń ǵımarattary kóshiriledi.

Ákimshilik ortalyqty tolyqqandy qamtamasyz etý úshin qosymsha qyzmettik jáne sharýashylyq nysandar da salynady.

Grýzııa bıligi buǵan deıin Tbılısıdiń jańa halyqaralyq áýejaıynyń qurylysy bastalǵanyn habarlaǵan bolatyn. Sonymen qatar, bıyl elde quny 300 mln AQSh dollaryna baǵalanǵan Grýzııa tarıhyndaǵy eń iri sporttyq nysannyń salynatyny týraly jarııalanǵan edi.