Grýzııa sheteldikter úshin vıza talaptaryn kúsheıtti

ASTANA.KAZINFORM — 2025 jylǵy 1 qazannan bastap Grýzııada shetel azamattarynyń elde bolý merzimin buzǵany úshin jaýapkershilikti kúsheıtetin jáne kóshi-qon úderisterin qatań baqylaýdy kózdeıtin jańartylǵan erejeler kúshine enedi, dep habarlaıdy Kazinform agenttiginiń menshikti tilshisi News Georgia-ǵa silteme jasap.

Atap aıtqanda, aıyppuldar edáýir ósip, elge qaıta kirýge tyıym salý merzimderi ulǵaıtylǵan:

• Elde bolý merzimin 3 aıǵa deıin asyryp jibergeni úshin – 1 000 ları (shamamen 360 dollar) aıyppul salynady jáne elge alty aı boıy qaıta kirýge tyıym salynady;

• 3 aıdan 1 jylǵa deıin — 2 000 ları aıyppul jáne 2 jyldyq tyıym;

• 1 jyldan asqan jaǵdaıda — 3 000 ları jáne 3 jyl boıy elge kire almaıdy.

Buryn bul sanktsııalar áldeqaıda jumsaq bolǵan.

Tranzıt erejelerin buzǵany úshin — 500 ları aıyppul qarastyrylǵan. Sonymen qatar, sheteldikterdi shaqyrý kezinde belgilengen rásimderdi buzǵan jeke jáne zańdy tulǵalarǵa qatysty jaýapkershilik te kúsheıtildi — aıyppul 1 000 larıden 2 000 larıge deıin ulǵaıtyldy.

Qylmystyq kodekske de ózgerister engizildi:

• Endi Grýzııada qylmys jasaǵan sheteldikterdi sot elden shyǵaryp jiberip, bir mezgilde elge kirýge tyıym sala alady:

  • 2 jyldan 10 jylǵa deıin – jeńil qylmystar úshin;

  • 5 jyldan 20 jylǵa deıin nemese ómir boıy – aýyr jáne asa aýyr qylmystar úshin.

Ákimshilik quqyqbuzýshylyqtar úshin elge kirýge tyıym salý merzimi 5 jyldan aspaıdy.

Bılik ókilderiniń aıtýynsha, bul jańashyldyqtardyń maqsaty — zańsyz kóshi-qondy baqylaýdy kúsheıtý, baspana alý kezinde teris paıdalanýdyń aldyn alý jáne sheteldikterdiń elde bolýyn retteıtin ashyq júıe qurý.

Bul túzetýler paketin parlament shilde aıynda maquldap, ol 18 zańnamalyq aktini, sonyń ishinde «Halyqaralyq qorǵaý týraly» zańdy qamtydy.

Buǵan deıin Grýzııa bıligi sheteldik IT-mamandarǵa turýǵa ruqsat alýdy jeńildetkenin jazǵan edik.