Grýzııa prezıdentin Moldovanyń prezıdenti bolýǵa shaqyrdy
Astana. 21 maýsym. QazAqparat - Kıshınev qalasynyń meri, Moldovanyń Lıberaldar partııasynyń jetekshisi Dorın Kırtoake Grýzııa Prezıdenti Mıhaıl Saakashvılıdi prezıdenttik merzimi aıaqtalǵannan keıin Moldovanyń prezıdenti bolýǵa shaqyrdy.
Mundaı málimdemeni qala basshysy Kıshınevtiń ákimshilik otyrysynda jasady.
Jıyn barysynda eldegi jemqorlyq máselesi talqylanýy kerek bolatyn. Qala basshysy taqyrypqa oraı óz usynysyn bylaı dep jetkizdi: «Maǵan bir oı keldi. Jýyrda Saakashvılıdiń Grýzııadaǵy ekinshi kezeńdegi prezıdenttik merzimi aıaqtalady. Úshinshi merzimge saılana almaıdy. Endeshe, Moldovaǵa kelip, bizdiń elimizde eki merzim prezıdenttik qyzmetti atqarsyn. Elimizdegi jemqorlyq máselesi joıylyp ketetinine senimdimin».
Degenmen Moldova konstıtýtsııasy boıynsha atalǵan eldiń prezıdenti bolýǵa úmitker Moldovada kem degende on jyl ómir súrýi kerek jáne memlekettik tildi bilýi kerek.
Alash aınasy
