Grýzııa prezıdenti saılaýaldy naýqandy ashty
ASTANA. QazAqparat - Grýzııanyń Mtsheta-Mtıanetı aımaǵy, Bazaletı kólindegi trenıng-ortalyqta el prezıdenti Georgıı Margvelashvılı jastardy 8 qazan kúni ótetin parlament saılaýyna qatysýǵa úgitteýge baǵyttalatyn «Seniń daýysyń - bizdiń bolashaǵymyz» atty saılaý aldyndaǵy naýqandy tanystyrdy.
«Sender qalalar men aýyldarǵa baryp, halyqty óz tańdaýyn jasaýǵa úgitteýleriń kerek. Olardy saıasatkerlerge qulaq asýǵa, bergen ýádeleriniń qanshalyqty aqylǵa qonymdy ekenine muqııat mán berýge shaqyrýlaryń kerek», - dep málimdedi Grýzııa prezıdenti.
Memleket basshysy ákimshiliginiń málimetterine sáıkes joba boıynsha Grýzııada 8 jazǵy mektep ashylady. Naýqannyń basty maqsaty el azamattaryn, ásirese jastardy saılaýǵa qatystyrý. Jáne bul naýqan eshqandaı saıası partııany jaqtamaıdy.
«Bárinen de mańyzdysy sol, sender halyqty belgili bir partııa jetekshisine daýys berińizder dep qınamaısyńdar. Jalǵyz ǵana atqaratyn sharýa - 2016 jyly 8 qazanda saılaý ýchaskesine kelip, óz tańdaýyn jasaýǵa kóndirýleriń kerek», - dep tolyqtyrdy G.Margvelashvılı.
«Seniń daýysyń - bizdiń bolashaǵymyz» jobasy el prezıdentiniń bastamasymen paıda boldy. Naýqan aıasynda jazǵy mektepterde baılanys, qarym-qatynas, kóshbasshylyq jáne saılaý ótkizý máseleleri jaıly dárister men trenıngter ótedi.
