Grýzııa prezıdenti Margvelashvılı: Qazaqstannyń qoldaýy úshin alǵys aıtamyz
ASTANA. QazAqparat - Búgin Qazaqstanǵa Grýzııa prezıdenti Georgıı Margvelashvılı keldi. Mártebeli meımandy Memleket basshysy Nursultan Nazarbaev Aqordada qarsy aldy, dep xabarlaıdy QazAqparat tilshisi.
«Qazaqstan sııaqty eldi kórý kópten kútken arman-nıetim edi. Sebebi Sizder týraly kóp estidim. Maǵan osy jerdegi adamdar, osy eldiń damý dınamıkasy týraly kóp aıtty. Qazir men Siz jáne Sizdiń xalqyńyzdyń qandaı jumystardy atqarǵanyn, qıyn jyldarǵa qaramastan nendeı jetistikterge jetkenderińizdi óz kózimmen kórip otyrmyn. Biz Sizderdiń qoldaýlaryńyzǵa shyn júrekten rızamyz. Grýzııa xalqy ony aıqyn sezinip otyr jánei joǵary baǵalaıdy. Uzaq ýaqyt boıy bizge qoldaý kórsetip jatqanyńyz úshin myń alǵys», - dedi Grýzııa basshysy shaǵyn quramda ótken kezdesý kezinde.
Nursultan Nazarbaev óz kezeginde Qazaqstannyń Grýzııa ekonomıkasyna qarjy salyp jatqan iri ınvestor ekenin eske salyp, atalǵan ekonomıkalyq sharalardyń áli de jalǵasatynyn jetkizdi.
«Astanada EKSPO-2017 kórmesiniń ashylǵanyn jaqsy bilesizder. Onda Grýzııa pavılony da ashyldy. Biz jańa qalanyń taǵy bir jańa aýdanyn salyp shyqtyq. Ony da kóresizder. Qazaqstan men Grýzııa arasyndaǵy baılanystar burynnan jaqsy damyp keledi. Alǵashqy jyldary kóp qoldaý kórsettik. Sodan beri biz Grýzııa ekonomıkasyndaǵy iri ınvestordyń biri bolyp kelemiz. Osy baılanystardy ary qaraı damytýǵa kedergi bolatyn eshqandaı sebepterdi kórip turǵan joqpyn», - dep atap kórsetti Nursultan Nazarbaev.
