Grýzııa prezıdenti Qazaqstan elshisinen senim gramotasyn qabyldap aldy
Kezdesý barysynda Qazaqstan Elshisi ekijaqty qatynastardyń qarqyndy damyp otyrǵanyn, sondaı-aq eki eldiń halyqaralyq uıymdar sheńberinde tabysty yntymaqtastyǵyn atap kórsetti. Ol Grýzııa Prezıdenti G.Margvelashvılıdiń ótken jylǵy maýsymdaǵy elimizge resmı saparynyń qorytyndylary men onyń Halyqaralyq mamandandyrylǵan «EKSPO-2017» kórmesi sheńberindegi Grýzııanyń Ulttyq kúnine qatysýyn Qazaqstanda joǵary baǵalaıtynyn atap ótti.
Elshi Grýzııa Prezıdentine Qazaqstanda júrgizilip otyrǵan saıası jáne ekonomıkalyq qaıta qurýlar, qoǵamdyq sanany jańǵyrtý, sondaı-aq elimizdiń halyqaralyq bastamalary týraly áńgimeledi.
Grýzııa Prezıdenti grýzın tarapynyń táýelsizdik jyldary tabysty damyp otyrǵan eki el arasyndaǵy ózara tıimdi, dástúrli dostyq qatynastardy odan ári damytýǵa daıyndyǵyn rastady. Ol Prezıdent Nursultan Nazarbaevqa jáne barlyq qazaqstandyqtarǵa halyqtyń ál-aýqatyn arttyrýǵa baǵyttalǵan memlekettik strategııalyq baǵdarlamalardy júzege asyrýda tabystarǵa jetýge izgi tilekterin bildirdi.
Ekijaqty saýda-ekonomıkalyq baılanystardy keńeıtý, kólik-tranzıt, týrıstik jáne mádenı-gýmanıtarlyq salalardaǵy yntymaqtastyqty arttyrý keleshekteri talqylandy.
Eske sala ketsek, Baýyrjan Álimuly mamyr aıynyń sońynda Memleket basshysynyń Jarlyǵymen Qazaqstan Respýblıkasynyń Grýzııadaǵy Tótenshe jáne Ókiletti Elshisi bolyp taǵaıyndalǵan.
