Grýzııa prezıdenti Batýmıdegi jaǵdaı boıynsha sabyrlyq saqtaýǵa úndedi
ASTANA. QazAqparat - Grýzııa prezıdenti Margvelashvılı Batýmıdegi tártipsizdikterge qatysýshylardy zańdy qurmetteýge shaqyrdy.
Bul týraly memleket basshysy Facebook-tegi paraqshasyna jazdy, dep habarlaıdy Lenta.rý.
«Oryn alǵan (Batýmıde) oqıǵalarǵa baılanysty barlyq tarapty sabyrlyq saqtap, jaǵdaıdyń odan ári ýshyǵýyna jol bermeýge shaqyramyz... Árıne, sóz bostandyǵy men jıyndar ótkizýge quqyqtaryńyz bar dep esepteımin, alaıda memlekettik ınstıtýttar men zańdardy qurmettep, kúsh kórsetýge jol bermeý qajet», - dep atap ótti prezıdent.
Grýzııa premer-mınıstri Georgıı Kvırıkashvılı de narazylyqqa qatysýshylardy sabyrly bolýǵa shaqyryp, jaǵdaıdy ýshyqtyrǵan «destrýktıvti saıası kúshterdi» aıyptady, dep habarlaıdy «Rýstavı 2» telearnasy. «Bul kúshter ... vandalızmge, memlekettik organdar qyzmetkerlerine zorlyq-zombylyq jasaýǵa qasaqana arandatty», - degen ol, bılik tártipti retteıtinine sendirdi.
Batýmıdegi bylyq senbi kúni, 11 naýryzda oryn aldy. Narazylyqtyń basty sebebi - jol júrý erejesin buzǵan júrgizýshige qatysty polıtseıdiń áreketi bolǵan. Keıinnen osyǵan qatysty ІІM qyzmetkerlerimen jaǵa ustasqan alty adam tutqyndalǵan. Batýmıdiń júzdegen turǵyny polıtsııanyń qalalyq bas basqarmasynyń aldyna jınalyp, olardyń bosatylýyn talap etti.
Qaqtyǵys saldarynan 22 adam, sonyń ishinde alty polıtseı zardap shekti.
Jergilikti telearnalarǵa silteme jasaı otyryp "TASS" agenttigi búgin tańerteń habarlaǵandaı, búlikke qatysqan 20-dan astam adam ustalyp, polıtsııa bólimshelerine jetkizildi.
