Grýzııa prezıdenti aktrısaǵa úılendi
ASTANA. QazAqparat - Grýzııa prezıdenti Georgıı Margvelashvılı sýretshi jáne aktrısa Maka Chıchýamen resmı túrde nekesin qıdy. Ekeýi birneshe jyldan beri azamattyq nekemen bir shańyraqtyń astynda turǵan edi.
Neke qııý saltanaty Dýshetıdegi (Grýzııanyń shyǵysyndaǵy aımaq) prezıdenttiń qala syrtyndaǵy úıinde ótti.
45 jastaǵy Georgıı Margvelashvılı osymen úshinshi ret úılenip otyr. Onyń birinshi áıelinen súıgen Anna esimdi qyzy qazir 22 jasta. Maka Chıchýanyń da alǵashqy kúıeýinen qyz balasy bar.
Maka Chıchýa telearnalardyń birinde vızajıst bolyp eńbek etken. Sondaı-aq ol sahnada da óner kórsetken, «Kúlimsire» («Ýlybaısıa») kórkem fılminde oınaǵan, dep habarlaıdy BELTA.
