Grýzııa Prezıdenti: Ekologııa ekonomıka men qaýipsizdikke tikeleı áser etedi
ASTANA. KAZINFORM – Grýzııa Prezıdenti Mıhaıl Kavelashvılı Óńirlik ekologııalyq sammıtte qorshaǵan orta máseleleriniń elder ekonomıkasy men qaýipsizdigine yqpaly artyp otyrǵanyn málimdedi.
Onyń aıtýynsha, qazirgi tańda ekologııa tek tabıǵatty qorǵaý sheńberinde qarastyrylatyn másele emes.
— Ekologııa búginde memleketterdiń ekonomıkalyq turaqtylyǵy men qaýipsizdigine áser etetin mańyzdy faktorǵa aınaldy. Klımattyń ózgerýi, bıoalýantúrliliktiń azaıýy, qorshaǵan ortanyń lastanýy men tabıǵı júıelerdiń álsireýi — ózara tyǵyz baılanysty kúrdeli máseleler, - dedi ol.
Prezıdent turaqty damý baǵyty Grýzııanyń memlekettik saıasatynyń negizgi basymdyqtarynyń biri ekenin atap ótti.
— Biz qorǵalatyn tabıǵı aýmaqtardyń kólemin ulǵaıtyp kelemiz. Sonymen qatar tabıǵı resýrstardy únemdi paıdalaný jáne qaıta óńdeýge negizdelgen ekonomıkany damytýǵa erekshe mán berip otyrmyz, — dedi Mıhaıl Kavelashvılı.
Sondaı-aq ol sý resýrstaryn tıimdi paıdalaný men aýyldyq óńirlerdi damytý máselesine toqtaldy.
— Halyqty taza aýyzsýmen qamtamasyz etý úshin sý júıelerin jańǵyrtý jumystary júrgizilip jatyr. Sý únemdeý men aýyl sharýashylyǵynyń turaqtylyǵyn arttyrý — negizgi mindetterdiń biri, — dedi ol.
Grýzııa Prezıdenti júrgizilip jatqan sharalardyń nátıjesi tek el ishinde ǵana emes, óńirlik deńgeıde de oń áser beretinin jetkizdi. Sóz sońynda ol óńirlik yntymaqtastyqtyń mańyzyn atap ótti.
— Ońtústik Kavkaz óńirlerdi baılanystyratyn mańyzdy keńistik retinde memleketter arasyndaǵy ózara is-qımyldy kúsheıtýge múmkindik beredi, — dedi Mıhaıl Kavelashvılı.
Aıta keteıik, buǵan deıin Grýzııada qoǵamdyq tamaqtaný oryndarynda plastık bótelkelerdi paıdalanýǵa tyıym salynǵany habarlanǵan edi.
