Grýzııa polıtsııasyna sheteldikterdiń jumys ruqsaty men yqtııarhatyn tekserýge ókilettik berildi
ASTANA. KAZINFORM — Grýzııanyń patrýldik polıtsııa qyzmetkerlerine standartty qujattar jıyntyǵymen qatar, shetel azamattarynan jumys isteýge ruqsaty men tıisti turýǵa yqtııarhatynyń bar-joǵyn tekserý quqyǵy berildi. Bul týraly Kazinform agenttiginiń menshikti tilshisi «Pro Grýzııý» Telegram-arnasyna silteme jasap habarlady.
Buǵan deıin mundaı ókilettik tek kóshi-qon qyzmetine tıesili bolǵan. Endi osyndaı tekserýlerdi Grýzııa Іshki ister mınıstrliginiń patrýldik polıtsııa qyzmetkerleri de júrgize alady.
Qoldanystaǵy zańnamaǵa sáıkes, Grýzııada eńbek qyzmetin júzege asyratyn nemese el aýmaǵynda ornalasqan klıenttermen jumys isteıtin shetel azamattarynyń jumys isteýge ruqsaty jáne tıisti turýǵa yqtııarhaty bolýy tıis.
Qajetti qujattar bolmaǵan jaǵdaıda 2 myń ları (shamamen 770 dollar) kóleminde aıyppul qarastyrylǵan. Al 2026 jylǵy qyrkúıekten bastap qoldanystaǵy jaza sharalaryna shetel azamatyn deportatsııalaý da qosylýy múmkin.
Buǵan deıin Grýzııada 1 qyrkúıekten bastap shetel azamattarynyń biryńǵaı tizilimi iske qosylatyny habarlandy.
