Grýzııa polıtsııasy Irannan kelgen esirtkiniń iri partııasyn tárkiledi

ASTANA. KAZINFORM – Grýzııanyń tártip saqshylary iri kólemdegi esirtkini elge ótkizý áreketiniń jolyn kesti, dep habarlaıdy Kazinform tilshisi.

Grýzııa Іshki ister mınıstriniń orynbasary Aleksandr Darahvelıdze arnaıy brıfıngide málim etkendeı, Grýzııa-Ázerbaıjan shekarasyndaǵy «Qyzyl kópir» ótkizý beketinde Irannan kele jatqan júk kóligi ustalyp, ishinen 200 keli geroın tabyldy. 

Grýzııanyń ishki ister mınıstrliginiń málimetinshe, esirtki zaty balyq taǵamynyń atyn jamylǵan segiz qapshyqta jasyrylǵan. Kólik Ázerbaıjan arqyly tranzıtpen ótip, ońtústik-shyǵys shekara ótkeli arqyly Grýzııaǵa kirgen. Jergilikti polıtsııa qyzmetkerleri tekserý kezinde tyıym salynǵan júkti anyqtaǵan. 

– Tárkilengen geroın, aldyn ala málimetter boıynsha, qara naryq dep atalatyn naryqta 50 mıllıon dollardan asady, - dep atap ótti Aleksandr Darahvelıdze. 

Oqıǵa ornynda kólik júrgizýshisi, 1989 jyly týǵan Iran Islam Respýblıkasynyń azamaty ustaldy. Onyń ústinen Qylmystyq kodekstiń 20 jylǵa deıin bas bostandyǵynan aıyrý nemese ómir boıyna bas bostandyǵynan aıyrý jazasy qarastyrylǵan baby boıynsha qylmystyq is qozǵaldy. 

Qazirgi ýaqytta esirtkini jóneltýdiń túpkilikti ornyn, sondaı-aq tyıym salynǵan zattardyń halyqaralyq aınalymyna qatysy bar barlyq tulǵany anyqtaý boıynsha tergeý júrgizilip jatyr. Shilde aıynda Grýzııada radıoaktıvti ýrandy zańsyz satty jáne satyp aldy dep aıyptalǵan eki kúdikti ustaldy.

Buǵan deıin Grýzııanyń esirtkiniń zańsyz aınalymyna qatysty zańdardy barynsha qataıtýdy josparlap otyrǵany habarlanǵan bolatyn.