Grýzııa polıtsııa qyzmetkerlerine shabýyl jasaǵany úshin jazany kúsheıtedi
ASTANA. KAZINFORM – Polıtseılerge qarsylyq kórsetý, olardy qorqytý jáne kúsh qoldaný qylmystyq quqyq buzýshylyq retinde saralanyp, bes jyldan alty jylǵa deıin bas bostandyǵynan aıyrý jazasyn qarastyrady.
Bul usynysty aldaǵy kúnderi parlamentte zań shyǵarý bastamalaryn qaraı bastaıtyn bıliktegi «Grýzın armany» fraktsııasy alǵa tartty.
- Birqatar normalar, eń aldymen, Ákimshilik quqyq buzýshylyq týraly kodekste, atap aıtqanda, menshik ıesiniń aldyn ala kelisiminsiz jabyq úı-jaılar men ǵımarattarda mıtıngiler ótkizýge tyıym salýdy qosa alǵanda, kúsheıtilip jatyr, - dedi brıfıngte partııanyń jaýapty hatshysy Mamýka Mdınaradze.
Budan basqa, depýtattyń aıtýynsha, usaq buzaqylyq, vandalızm, tártip saqshylaryna baǵynbaý jáne balaǵattaý, sot ǵımarattaryna kireberisterdi bógeý jáne basqa da osyǵan uqsas ákimshilik quqyq buzýshylyqtar úshin aıyppul ulǵaıtylyp, ákimshilik qamaýǵa alý merzimi 60 táýlikke deıin uzartylady.
Mdınaradze Grýzııada polıtsııa qyzmetkerlerine qarsylyq kórsetkeni, olarǵa qarsy qoqan-loqqy jáne zorlyq kórsetkeni úshin qylmystyq jaza merzimi uzartylatynyn qosyp ótti. Mundaı áreketter aýyr qylmys sanatyna jatqyzylyp, bes jyldan alty jylǵa deıin bas bostandyǵynan aıyrý jazasyn kózdeıdi.
Ol ákimshilik quqyqbuzýshylyq boıynsha aıyppul kólemi de aıtarlyqtaı ósetinin atap ótti.
Grýzın oppozıtsııasynyń ókilderi bul bastamalar Tbılısı men basqa da qalalarda eki aıdan astam ýaqyt boıy jalǵasyp kele jatqan narazylyq qozǵalysyn túbegeıli basý maqsatyn kózdep otyrǵanyn málimdedi.
Jeltoqsan aıynda Grýzııa astanasyndaǵy jappaı narazylyqtyń onynshy kúni arnaıy jasaq sherýshilerdi sýatqyshtar men kózden jas aǵyzatyn gaz qoldanyp, taratqanyn jazǵan bolatynbyz.
Buǵan deıin jappaı narazylyq sherýleri bolyp jatqan Grýzııada júrgen qazaqtar eldegi jaǵdaı týraly aıtqan bolatyn.
Grýzın oppozıtsııasy bıliktiń EO-ǵa kirý jónindegi kelissózderdi 2028 jylǵa deıin toqtatý týraly sheshimine narazylyq bildirgen.