Grýzııa plastık bótelkege tyıymdy 2031 jylǵa qaldyrdy
ASTANA.KAZINFORM - Grýzııa premer-mınıstri Iraklıı Kobahıdze úkimet plastıkalyq bótelkelerdegi sýsyndardy óndirýge, ımporttaýǵa jáne satýǵa qatysty ereje engizýdi keıinge qaldyrý týraly sheshim qabyldaǵanyn málimdedi, dep habarlaıdy Kazinform agenttiginiń aımaqtaǵy tilshisi.
Onyń aıtýynsha, shekteýlerdiń jańa merzimi 2031 jyldyń 1 aqpanyna aýystyrylyp, bastamany iske asyrý tórt jylǵa keıinge qaldyryldy.
Iraklıı Kobahıdze plastık tutynýdy azaıtý qorshaǵan ortany jáne qoǵam densaýlyǵyn qorǵaý úshin mańyzdy ekenin, biraq bul saıasatty iske asyrý ekonomıkalyq faktorlardy, sonyń ishinde bıznes múddelerin jáne baǵanyń ósýin tejeý qajettigin eskere otyryp, kezeń-kezeńmen júzege asyrylatynyn atap ótti.
- Plastıkalyq zatty tutyný adam densaýlyǵyna da, qorshaǵan ortaǵa da qaýip tóndiredi. Bul baǵytta mańyzdy qadamdar jasaldy jáne bul protsess jalǵasady. Alaıda, biz bıznes múddesi men onyń baǵaǵa áser etýin, taǵy basqa faktorlardy eskerýimiz kerek. Bıznes qaýymdastyǵynyń ókilderimen belsendi keńesterden keıin tıisti ereje engizýdi keıinge qaldyrý týraly sheshim qabyldandy, - dedi premer-mınıstr.
1 sáýirden bastap Grýzııa bir ret qoldanylatyn plastıkalyq ydys-aıaqtardy satýǵa tyıym saldy.
