Grýzııa parlamenti «Sheteldik agent týraly» zańdy sońǵy oqylymda qabyldady

ASTANA.KAZINFORM — Normatıvtik quqyqtyq akt Grýzııa Ádilet mınıstrliginiń tiziliminde tirkeýden jaltaryp, shetelden qarjylandyrylatyn zańdy jáne jeke tulǵalardy qylmystyq jaýapkershilikke tartýdy kózdeıdi, dep habarlaıdy Kazinform.

Grýzııa parlamenti úshinshi jáne sońǵy oqylymda amerıkalyq FARA (Foreign Agents Registration Act) Zańynyń balamasy sanalatyn «Sheteldik agentterdi tirkeý aktisi» Zańyn qabyldady.

- Jańa zańdaǵy qylmystyq qýdalaý týraly bap tirkeýden jaltarǵan uıymdardyń aldyn alý sharasyna aınalady jáne olar mıllıondaǵan dollardyń qaıdan kelgenin, ne úshin jumsalyp jatqanyn halyqqa túsindirýi kerek, — dedi jýrnalısterge parlamenttiń quqyqtyq máseleler jónindegi komıtetiniń tóraǵasy Archıl Gordýladze.

Zańdy qabyldaýǵa 86 depýtat daýys berdi. Ol Prezıdent qol qoıyp, eldiń Zań shyǵarýshy organynyń saıtynda jarııalanǵannan keıin kúshine enedi.

Buǵan deıin parlament spıkeri Shalva Papýashvılı shetelden qarjylandyrylatyn 136-dan astam ÚEU «Sheteldik yqpaldyń ashyqtyǵy týraly» zańǵa narazylyq bildirip jatqanyn, al 156-sy Ádilet mınıstrliginde tirkeý rásimin aıaqtaǵanyn málimdegen.

Іshki qarsylyqtar men halyqaralyq synǵa qaramastan, bıleýshi ​​«Grýzın armany» partııasy bul zańnyń ashyqtyqty qamtamasyz etý jáne ulttyq egemendikti qorǵaý úshin qajet dep sanaıdy.

Grýzııada «Sheteldik yqpaldyń ashyqtyǵy týraly» zań 2024 jyldyń 1 tamyzynda kúshine endi. Kirisiniń 20%-dan astamyn shetelden alatyn úkimettik emes uıymdar men BAQ-ty Memlekettik tirkeýdiń ulttyq agenttiginde tirkeýge mindetteıdi.

Buǵan deıin Grýzııa parlamenti 49 depýtattyń ókilettigin merziminen buryn toqtatqany habarlanǵan bolatyn