Grýzııa parlamenti mıtıngiler men sherýlerdegi zań buzýshylyqtar úshin jazany kúsheıtti

ASTANA. KAZINFORM — Zań jobasynda birinshi ret quqyq buzǵany úshin 60 táýlikke deıin ákimshilik qamaýǵa alý jáne mıtıngiler men sherýlerge qatysý erejelerin qaıtalap buzǵany úshin eki jylǵa deıin qylmystyq jaýapkershilik qarastyrylǵan, dep habarlaıdy Kazinform menshikti tilshisi. 

Grýzııa parlamenti Ákimshilik quqyq buzýshylyqtar týraly kodekske jáne Qylmystyq kodekske jappaı narazylyqqa qatysý jáne polıtsııaǵa baǵynbaý erejelerin buzǵany úshin jazany aıtarlyqtaı kúsheıtetin túzetýlerdi jedel túrde qabyldady. Zań jobasyna «Grýzın armany» partııasynyń ókilderi bastamashy bolyp, ol plenarlyq otyrysta úsh oqylymda maquldandy.

Jańa normalarǵa sáıkes, mıtıngide betin búrkeý, kózden jas aǵyzatyn gaz nemese basqa da ýly zattardy qoldaný, sondaı-aq qatysýshylar joldy japqany úshin 15 táýlikke deıin ákimshilik qamaýǵa alynady, al aktsııany uıymdastyrýshylar úshin bul merzim 20 táýlikke deıin uzartyldy.

Polıtsııa sharany toqtatýdy talap etip, qatysýshylar baǵynbaǵan jaǵdaıda 60 táýlikke deıin qamaýǵa alý jazasy qarastyrylǵan. Osyǵan uqsas jaza shara kezinde atys qarýyn nemese pırotehnıkalyq zattardy alyp júrý úshin de qarastyrylyp otyr.

Qylmystyq kodekske engizilgen ózgertýler qaıtalanatyn tártip buzýshylyqtar úshin jaýapkershilikti belgileıdi: ekinshi ret jasalǵan áreket úshin bir jylǵa deıin jáne odan keıin jasalǵan zań buzý úshin eki jylǵa deıin bas bostandyǵynan aıyrý.

Premer-mınıstr Iraklıı Kobahıdzeniń aıtýynsha, qoǵamdyq jıyndarda zań buzý  úshin aıyppul tıimdi emes, al jańa sharalar azamattardyń kópshiliginiń múddelerin qorǵaýǵa, qoǵamdyq tártipti qamtamasyz etýge jáne kóshedegi zorlyq-zombylyqtyń aldyn alýǵa baǵyttalǵan.

Zań jobasy avtorlary atap ótkendeı, jańa normalar narazylyq bildirý quqyǵy men qoǵamdyq qaýipsizdik arasyndaǵy tepe-teńdikti saqtaýǵa, sondaı-aq radıkaldardyń shaǵyn tobynyń jol qozǵalysyna kedergi keltiretin jáne basqa azamattarǵa qaýip tóndiretin teris áreketterdiń aldyn alýǵa baǵyttalyp otyr.

Eske sala ketsek, 4 qazanda Grýzııada jergilikti ózin-ózi basqarý organdaryna saılaý ótti. Grýzııanyń Ortalyq saılaý komıssııasynyń dereginshe, bıýlletenderdiń 74 paıyzdan astamy sanalǵan kezde bıleýshi partııa 80 paıyzdan astam daýys jınaǵan. Ekinshi orynda — oppozıtsııalyq «Kúshti Grýzııa» partııasy (6,8%), al úshinshi orynda «Gaharııa — Grýzııa úshin» partııasy (3,8%) tur.

Narazylyq aktsııasyna shyqqandar Tbılısıdegi Atonelı kóshesinde ornalasqan prezıdent saraıynyń aýlasyna basyp kirgen. Sol jerde demonstranttar men polıtseıler arasynda qaqtyǵys bolyp, quqyq qorǵaý organdary sýatqyshtar men kózden jas aǵyzatyn gaz qoldanǵan.

Tártipsizdikter kezinde 14 polıtseı jaraqat aldy.

Elde mıtıng uıymdastyrǵandarǵa bılikti qulatýǵa áreket jasady degen aıyp taǵyldy. 

Grýzııadaǵy tártipsizdikke qatysqandar sany 39 adamǵa jetti.