Grýzııa parlamenti LGBT nasıhatyna tyıym salatyn zań qabyldady

ASTANA.KAZINFORM - Grýzııa parlamenti úshinshi qorytyndy oqylymda «Otbasy qundylyqtary jáne kámeletke tolmaǵandardy qorǵaý týraly» zańdy maquldady, dep jazady NewsGeorgia.

Zań jobasyn 84 depýtat qoldasa, oppozıtsııa daýys berýge qatysqan joq. Bıliktegi «Grýzın armany» partııasy zańdy qaraýǵa engizdi. Al, oppozıtsııa parlament jumysyna boıkot jarııalap, daýys berýge qatysqan joq. 

Usynylǵan túzetýler birjynystylardyń nekege turýyna, birjynysty juptardyń bala asyrap alýyna jáne transgenderlikke kóshýge tyıym salýdy qarastyrady. Dárigerlerge transgenderlikke aýysýdy jeńildetetin operatsııalar men basqa da manıpýlıatsııalardy jasaýǵa tyıym salynady. Mundaı rásimderdi oryndaý qylmystyq jaýapkershilikke, onyń ishinde bas bostandyǵynan aıyrýǵa ákep soǵady. Sonymen qatar bilim berý uıymdarynda jáne buqaralyq aqparat quraldarynda birjynystylardyń qarym-qatynasyn «tanystyrýǵa» baǵyttalǵan aqparatty jarnamalaýǵa jáne taratýǵa tyıym salynady. Sondaı-aq «nasıhattaýǵa» baǵyttalǵan qoǵamdyq jınalystardy (mıtıngiler nemese sherýler) ótkizýge tyıym salynady. 

«LGBT nasıhatyna» tyıym salatyn zań Eýropalyq Odaq tarapynan synǵa ushyrady. Eýropalyq dıplomatııanyń basshysy Jozep Borrel Grýzııa bıligin «LGBT nasıhatyna» tyıym salatyn zańnyń kúshin joıýǵa shaqyryp, bul eldi EO-ǵa kirýden odan ári alshaqtatatynyn atap kórsetti.

Grýzııa parlamenti adamdardyń negizgi quqyqtaryna nuqsan keltiretin jáne kemsitýshilik pen stıgmatızatsııany kúsheıtetin «otbasylyq qundylyqtar jáne kámeletke tolmaǵandardy qorǵaý» týraly zań qabyldady.

«Men Grýzııany eldi EO-ǵa ótý jolynan odan ári taıdyratyn zańnamany alyp tastaýǵa shaqyramyn», - dep jazdy Borrel X áleýmettik jelisindegi paraqshasynda.