Grýzııa parlamenti apparatynda ChatGPT men Claude júıeleri qoldanylady
ASTANA. KAZINFORM — Grýzııa parlamentiniń apparaty qyzmetkerleriniń jumysyn tıimdi etý úshin ChatGPT Business jáne Claude AI Pro platformalaryna bir jyldyq lıtsenzııa satyp almaq. Bul týraly Kazinform agenttiginiń óńirdegi menshikti tilshisi Business Media basylymyna silteme jasap habarlaıdy.
Grýzııanyń memlekettik satyp alý portalyndaǵy derekke sáıkes, jeti paıdalanýshyǵa arnalǵan ChatGPT Business platformasynyń bir jyldyq lıtsenzııasy 10 500 larıden (shamamen 4 myń dollar) aspaıdy. Al Claude AI Pro lıtsenzııasyn satyp alýǵa 826,84 ları (shamamen 320 dollar) bólingen.
Satyp alý qujattarynda kórsetilgendeı, bul bastama parlament apparatynyń jumysyna jasandy ıntellektiniń zamanaýı múmkindikterin engizýdi kózdeıdi. Atap aıtqanda, ChatGPT Business platformasy jumys protsesterin avtomattandyrýǵa, úlken kólemdegi derekter men mátinderdi taldaýdy jedeldetýge jáne jumys ýaqytyn tıimdi paıdalanýǵa múmkindik beredi.
ChatGPT Business platformasyn paıdalaný quny onyń tarıfteri men suranys kólemine qaraı belgilengen. Jeti adamǵa arnalǵan bir jyldyq jazylym quny 10 500 larıden aspaıdy.
Atalǵan qujatta JI engizý parlament apparatynyń jumys ónimdiligin arttyrýǵa baǵyttalǵany aıtylǵan.
Eske salaıyq, buǵan deıin Qazaqstan men Grýzııa jasandy ıntellekt salasyndaǵy áriptestikti kúsheıtetinin habarlaǵan edik.
