Grýzııa parlamenti 49 depýtattyń ókilettigin merziminen buryn toqtatty

ASTANA. KAZINFORM — Sheshim daýys berý qorytyndysy boıynsha qabyldandy, dep habarlaıdy Kazinform menshikti tilshisi.

Úsh oppozıtsııalyq birlestiktiń ókilderi 2024 jyldyń qarasha jáne jeltoqsan aılarynda ózderiniń depýtattyq ókilettikterin merziminen buryn toqtatý týraly ótinish jazdy. Olardyń arasynda «Biryńǵaı ulttyq qozǵalys», «Ózgerister koalıtsııasy» jáne «Myqty Grýzııa» bar.

Olar bılik saılaýdy burmalady dep tujyrymdap otyr. Oppozıtsııa 11-shi saılanǵan Parlamentti zańsyz dep jarııalady, sonymen qatar zań shyǵarýshy organda jumys isteýden bas tarta otyryp, jańa saılaý ótkizýdi talap etti.

2024 jylǵy 26 qazandaǵy saılaý qorytyndysy boıynsha Ortalyq saılaý komıssııasynyń qorytyndy hattamasyna sáıkes, «Myqty Grýzııa» 14 mandat aldy, «ózgerister úshin Koalıtsııa» 19 orynǵa ıe boldy, al «Birlik — ulttyq qozǵalys» 16 mandat jeńip aldy.

Djordj Gaharııa bastaǵan «Grýzııa úshin» oppozıtsııalyq partııasy parlamentte 12 orynǵa ıe. Alaıda, basqa oppozıtsııalyq partııalar sııaqty, olar da saılaýdy zańsyz dep sanaıdy jáne parlamenttik qyzmetke qatysýdan bas tartady. Degenmen basqa partııalar sııaty olar resmı túrde otstavkaǵa ketýge ótinish bermedi.

Eske salsaq, 26 qazanda Grýzııada parlamenttik saılaý ótti. Bıliktegi «Grýzın armany – demokratııalyq Grýzııa» partııasy parlamenttik saılaýda 56,1% daýys jınady.

Keıinnen Grýzııanyń OSK saılaýdy burmalaý týraly aıyptaýlardy tergeýge shaqyrdy.

Budan bólek, Grýzııadaǵy oppozıtsııa saılaýdy qaıta ótkizýdi talap etip, halyq kóshege shyqty.