Grýzııa oıyn bıznesi salasyndaǵy zańnamany qatańdatpaq
ASTANA. KAZINFORM — Tıisti túzetýler «Lıtsenzııalar men ruqsattar týraly», sondaı-aq «Lotereıalar, qumar oıyndar jáne utys oıyndary týraly» zańdarǵa engizilip otyr, dep Grýzııanyń Birinshi qoǵamdyq habar taratýshysyna silteme jasaı otyryp, Kazinform agenttiginiń menshikti tilshisi jazdy.
Zań jobasyna sáıkes, qumar jáne utys oıyndaryn ótkizýge lıtsenzııasy bar tulǵalar mindetti tólemderdi belgilengen merzimde júıeli túrde buzǵan jaǵdaıda, jaýapkershilik sharalary edáýir kúsheıtiledi. Buryn sanktsııalar aıyppuldy úsh esege arttyrýmen shektelse, endi qaıtalanǵan zań buzýshylyqtar kezinde qyzmet júrgizý ruqsatyn qaıtaryp alý qarastyrylǵan.
Úkimettiń málimetinshe, qazirgi aıyppul júıesi tıisti aldyn alý áserin bermeıdi. Keıbir jaǵdaılarda operatorlarǵa lıtsenzııa talaptaryn saqtaǵannan góri, olardy buzyp, aıyppul tólegen tıimdirek bolyp otyr.
Osyǵan baılanysty lıtsenzııalyq talaptardy buzǵany úshin aıyppul kólemin edáýir arttyrý usynylýda. Máselen, kazınolar úshin aıyppul 7 000 larıden (shamamen 2600 AQSh dollary) 20 000 larıge (7400 dollar) deıin ósedi. Oıyn avtomattary zaldary úshin sanktsııalar 1 000 larıden (370 dollar) 10 000 larıge (3700 dollar) deıin ulǵaıady.
Oıyn klýbtary men utys oıyndary operatorlary úshin aıyppul burynǵy 2 000 ları (740 dollar) ornyna 10 000 ları (3700 dollar) bolady. Sonymen qatar, lotereıa, elektrondy oıyn avtomattary jáne totalızator uıymdastyrýshylary úshin aıyppul 7 000 larıden (2600 dollar) 20 000 larıge (7400 dollar) deıin artady.
Atalǵan ózgerister oıyn ındýstrııasyn baqylaýdy kúsheıtýge, operatorlardyń jaýapkershiligin arttyrýǵa jáne lıtsenzııalyq talaptardyń saqtalýyn qamtamasyz etetin tıimdi tetikterdi qalyptastyrýǵa baǵyttalǵan.
Eske salaıyq, buǵan deıin aqpan aıynda Grýzııa úkimeti shetel azamattaryna taksı júrgizýshisi, kýrer jáne gıd bolyp jumys isteýge tyıym salǵan edi.
Grýzııada qoǵamdyq tamaqtaný oryndarynda plastık bótelkelerge tyıym salynady.
