Grýzııa neke arqyly elde turýǵa ruqsat alý erejelerin qatańdatty
ASTANA. KAZINFORM – Grýzııa bıligi sheteldikterdiń elde bolýyn zańdastyrý úshin qoldanylatyn jalǵan nekelerge qarsy kúresti kúsheıtýdi kózdep otyr, dep habarlaıdy Kazinform agenttiginiń aımaqtaǵy tilshisi.
Eldiń ІІM habarlaýynsha, Grýzııa azamaty men sheteldik arasynda elde turýǵa ruqsat alý nemese elde zańdy turýdyń basqa negizderi úshin jasalǵan jalǵan nekelerdi qylmystyq jaýapkershilikke tartý usynylyp otyr.
Zań jobasyna sáıkes, mundaı buzýshylyqtar úshin aıyppul salý, bir jyldan eki jylǵa deıin úıqamaqqa alý nemese eki jylǵa deıin bas bostandyǵynan aıyrý jazasy qoldanylýy múmkin. Sheteldikterge qatysty qosymsha sharalar da usynyldy: Grýzııadan deportatsııalaý jáne elge eki jyldan on jylǵa deıin kirýge tyıym salý.
Ózgerister paketi kóshi-qon protsesterin baqylaýdy kúsheıtýge, turýǵa ruqsat alý kezinde teris paıdalanýdyń aldyn alýǵa jáne kóshi-qon rejımin buzýdy anyqtaý tetikterin jetildirýge baǵyttalǵan.
Vedomstvo sondaı-aq sheteldik azamattardyń Grýzııada bolýyna qatysty erejelerdi qatańdatýdy, kóshi-qon organdarynyń ókilettikterin keńeıtýdi jáne kóshi-qon zańnamasynyń saqtalýyn baqylaý tıimdiligin arttyrýdy usynyp otyr.
Parlament maquldaǵan jaǵdaıda jańa erejeler sońǵy jyldary sheteldikterdiń elde bolý negizderin baqylaýdy únemi kúsheıtip kele jatqan Grýzııanyń kóshi-qon saıasatyn qataıtý jolyndaǵy taǵy bir qadam bolady.
Osyǵan deıin Grýzııa ımmıgratsııalyq erejelerdi qatańdatatynyn jazdyq.
Sondaı-aq elde 6 aıdan astam shetelde júrgen azamat medsaqtandyrýdan aıyrylatynyn jazǵan bolatynbyz.
