Grýzııa múshelik talaptaryn oryndaǵan boıda NATO múshesi bolady - A.Rasmýssen
BRıÝSSELЬ. 5 maýsym. QazAqparat - NATO Tbılısı múshelikke barlyq talaptardy oryndap, Blokqa qosylý úshin ólshemderdi qanaǵattandyrǵan boıda Grýzııany Alıansqa qabyldaýǵa ázir ekenin kezekti márte qýattady.
Bul týraly Alıanstyń 28 múshe-memleketteri qorǵanys mınıstrleriniń kezdesýi barysynda ótip jatqan «NATO-Grýzııa» Komıssııasy otyrysyn asha otyryp, NATO bas hatshysy Anders Fog Rasmýssen aıtty.
«Men Grýzııanyń bolashaqta Alıans múshesi bolýyn asyǵa kútýdemin. NATO-nyń Býharestegi sammıtinde qabyldanǵan sheshim qazirge deıin ózekti. Múshelikke talaptardy oryndaǵan boıda Grýzııa NATO múshesi bolady», - dedi A. Rasmýssen.
NATO múshe-memleketteriniń qorǵanys mınıstrleri Alıanstyń Grýzııamen mańyzdy reformalardy ótkizýge qoldaý jumysyn jalǵastyrýǵa kelisti. Sonymen birge Soltústikatlantıkalyq blok Grýzııaǵa óz maqsatyna jetýge qajetti barlyq kómekti kórsetetin bolady.
