Grýzııa men Túrkııa halyqaralyq júk tasymalyna elektrondy ruqsat júıesine kóshti
ASTANA. KAZINFORM – Grýzııanyń Qurlyq kóligi agenttigi Grýzııa men Túrkııa arasyndaǵy halyqaralyq avtomobıl júk tasymalyna arnalǵan ruqsat qujattaryn elektrondy túrde berý jáne almasý júıesin iske qosty, dep habarlaıdy Sınhýa.
Vedomstvonyń málimetinshe, endi eki el arasynda halyqaralyq júk tasymalyn júzege asyratyn tasymaldaýshylar ruqsat qujattaryn tolyqtaı elektrondy formatta paıdalana alady.
Jańa júıe ákimshilik rásimderdi jeńildetip, qaǵaz qujattardy óńdeý qajettiligin azaıtady. Sondaı-aq ruqsattardy berý men baqylaý úderisin jedeldetip, halyqaralyq júk tasymalynyń tıimdiligin arttyrady.
Grýzııanyń Qurlyq kóligi agenttiginiń dırektory Bakýr Mıkadzeniń aıtýynsha, tsıfrlyq júıe ekijaqty qaǵıdat boıynsha jumys isteıdi. Onyń aıasynda Grýzııa men Túrkııa ruqsat qujattaryn almasý jáne esepke alý úshin biryńǵaı elektrondy platformany qoldanady.
Onyń sózinshe, bul derekterdiń qaýipsiz ári jedel almasýyn qamtamasyz etip, tehnıkalyq jáne ákimshilik kidiristerdi azaıtady ári halyqaralyq avtomobıl júk tasymalyn basqarýdyń ashyq ári zamanaýı tetigin qalyptastyrady.
Agenttik kópjaqty Eýropalyq kólik mınıstrleri konferentsııasynyń ruqsattaryn elektrondy formatta paıdalaný júıesiniń jáne Túrkııamen tsıfrlyq almasý tetiginiń iske qosylýyn halyqaralyq avtomobıl tasymalyn damytýdaǵy mańyzdy kezeń dep baǵalady.
Vedomstvonyń pikirinshe, bul jańashyldyq kólik-logıstıka salasynyń damýyna, halyqaralyq saýdany jeńildetýge jáne Grýzııanyń óńirdegi negizgi tranzıttik hab retindegi rólin nyǵaıtýǵa yqpal etedi.
Aıta ketelik Aqtaýdan Úrimshige jáne Astanadan Ystyqkólge tikeleı reıster ashylǵan edi.
