Qazaqstan men Grýzııanyń saýda-ekonomıkalyq yntymaqtastyǵyn nyǵaıtý máselesi talqylandy
ASTANA. KAZINFORM — Premer-mınıstr Oljas Bektenov Grýzııanyń ekonomıka jáne turaqty damý mınıstri Marıam Kvrıvıshvılımen kezdesý ótkizdi. Bul týraly Úkimettiń baspasóz qyzmeti málim etti.
Onda saýda men ınvestıtsııalardy damytýdy, ınfraqurylymdyq jobalardy júzege asyrýdy, kólik-logıstıkalyq baılanystardy keńeıtýdi, onyń ishinde Transkaspıı halyqaralyq kólik baǵyty (THKB) sheńberinde, sondaı-aq AÓK-degi taýar aınalymyn arttyrýdy qosa alǵanda, ekijaqty yntymaqtastyq máseleleri qaraldy.
Premer-mınıstr Qazaqstan Grýzııany turaqty jáne ózara tıimdi dıalog quratyn senimdi ekonomıkalyq áriptes retinde qarastyratynyn atap ótti.
2025 jylǵy qańtar-mamyr aılarynda eki el arasyndaǵy taýar aınalymy $75,2 mln-dy qurady, bul ótken jyldyń sáıkes kezeńimen salystyrǵanda 35,7%-ǵa artyq.
Kezdesý barysynda kóliktik-logıstıkalyq ózara is-qımyldy nyǵaıtýǵa kóńil bólindi. 2025 jyldyń birinshi jartyjyldyǵynda elder arasyndaǵy temirjol júk tasymalynyń kólemi 159,5 myń tonnadan asty, bul 2024 jyldyń sáıkes kezeńimen salystyrǵanda 67%-ǵa artyq.
THKB-ny damytýdaǵy mańyzdy qadam PTC Holding kompanııasy salǵan jobalyq qýaty jylyna 120 myń JFE quraıtyn Grýzııanyń Potı portynda jańa qazaqstandyq konteıner termınalynyń iske qosylýy boldy. Bul Grýzııanyń negizgi teńiz habtarynyń biriniń aýmaǵynda júzege asyrylǵan alǵashqy qazaqstandyq ınfraqurylymdyq joba.
— Bul orta dáliz boıynsha júk aǵynynyń kólemin arttyrýda mańyzdy ról atqaratyn birlesken tabysty jumystyń jarqyn mysaly. Atalmysh joba Qytaıdyń Lıanıýngan jáne Sıan qalalaryndaǵy logıstıkalyq termınaldardy qosa alǵanda, THKB sheńberinde Qazaqstannyń qoldanystaǵy ınfraqurylymyn úılesimdi túrde tolyqtyryp otyrǵanyn atap ótý mańyzdy. Osylaısha, Shyǵys Azııany Eýropamen baılanystyratyn birtutas, dáıekti logıstıkalyq tizbek qurylýda, — dep atap ótti Oljas Bektenov.
Marshrýtty odan ári damytý dálizdiń tıimdiligin arttyrýǵa, qosymsha tranzıttik júkter men ınvestıtsııalardy tartýǵa, sondaı-aq Qazaqstan men Grýzııanyń óńirdiń negizgi logıstıkalyq ortalyqtary retindegi pozıtsııasyn nyǵaıtýǵa múmkindik beredi.
Sonymen qatar, Batýmı munaı termınaly men portynyń qýatyn keńeıtý, qazaqstandyq aýyl sharýashylyǵy ónimderin - astyq, un, et-sút jáne kondıterlik ónimderdi grýzın naryǵyna jetkizýdi ulǵaıtý múmkindikteri talqylandy.
Grýzııanyń Ekonomıka jáne turaqty damý mınıstri Marıam Kvrıvıshvılı Qazaqstanmen saýda, týrızm jáne logıstıkalyq ınfraqurylym salalarynda áriptestikti keńeıtýdiń mańyzdylyǵyna toqtaldy.
Sonymen qatar týrıstik baılanystardy nyǵaıtýdyń, ekonomıkalyq ósimdi yntalandyrý men kólik jelisin damytýdyń mańyzdylyǵy atap ótildi.
Kezdesý qorytyndysy boıynsha taraptar qol jetkizilgen ýaǵdalastyqtardy iske asyrýǵa jáne Úkimetaralyq komıssııa sheńberinde jumysty jalǵastyrýǵa daıyn ekendikterin jetkizdi.
Eske sala keteıik, buǵan deıin Oljas Bektenov Ekonomıkalyq saıasat jónindegi keńestiń otyrysyn ótkizgenin jazǵan edik.