Grýzııa men Dýbaıdaǵy kıberalaıaqtar úndistandyqtardyń shoty arqyly 19 mln dollar urlady
ASTANA. KAZINFORM — Grýzııa men Dýbaıda áreket etken kıberalaıaqtar Úndistannyń Radjasthan shtaty turǵyndarynyń banktik shottary arqyly shamamen 19 mln dollarǵa deıingi qarajatty zańdastyryp alǵan, dep habarlaıdy NGnewsgeorgia.
Úndistan bıligi «Cyber Hunt» («Kıberań») kodtyq ataýymen ótken operatsııa nátıjesinde halyqaralyq jeliniń áshkerelengenin qańtar aıynda habarlaǵan.
Tergeý málimetinshe, shema bylaı jumys istegen: Dýbaıda ornalasqan úsh operator tsıfrlyq ámııandar, bank arnalary jáne deldal platformalar arqyly aqsha qozǵalysyn baqylap otyrǵan, al Grýzııadaǵy negizgi úılestirýshi ártúrli ıýrısdıktsııalar arasyndaǵy tranzaktsııalardy basqarǵan.
Qarajat aldymen Radjasthandaǵy jalǵan shottarǵa túsip, keıin izin jasyrý úshin ártúrli qarjylyq quraldar arqyly dereý shyǵarylyp otyrǵan.
Іs boıynsha eki negizgi kúdikti Gýdjarat shtatynda ustaldy, ekeýi de quqyq qorǵaý organdarynyń nazaryna ilikkennen keıin elden ketýge áreket jasaǵan. Olardyń biri — jeke banktiń qyzmetkeri Kaýshal Kýmhar, ol qyzmettik múmkindigin paıdalanyp, kóptegen bank shottaryn jappaı ashýǵa kómektesken.
Alaıaqtar azamattardyń jeke derekterin qoǵamdyq oryndarda — ýnıversıtetterdiń mańynda, adam kóp júretin kóshelerde jáne vokzaldarda ýaqytsha kıoskiler men shatyrlar ornatyp, «memlekettik jeńildikter» nemese «qarjylyq kómek» ýáde etý arqyly jınaǵan.
Shot ıeleri, negizinen, tabysy tómen jumysshylar, jumyssyz jastar men stýdentter, óz shottarynyń kúmándi operatsııalar úshin paıdalanylyp jatqanyn bilmegen.
— Shottar tek tranzıttik arna retinde qoldanyldy. Aqsha túsken boıda birden shyǵarylyp otyrǵan, — dedi tergeýge qatysqan aǵa ofıtser.
Polıtsııa tergeýdi jalǵastyryp jatyr: quqyq qorǵaý organdarynyń nazarynda basqa bank qyzmetkerleri, shot ashý agentteri jáne qarjylyq deldaldar da bar. Úndistan turǵyndaryna qujattaryn beıtanys adamdarǵa bermeý, shot ashýdyń maqsatyn muqııat tekserý jáne kúmándi operatsııalar týraly kıberpolıtsııaǵa dereý habarlaý jóninde eskertý jasaldy.
Aıta ketelik Túrkistan oblysynda ınternet-alaıaqtarǵa urynǵandar 1,6 mlrd teńgesinen aıyrylǵan edi.