Grýzııa men Ázerbaıjannan ákelingen kólikterdi qalaı rásimdeýge bolady
Komıtet tóraǵasynyń aıtýynsha, el aýmaǵynda ýaqytsha ákelingen kólik quraldaryn satyp alýǵa, sondaı-aq mundaı mashınalardy paıdalanýǵa tek kedendik tazartýdan ótkennen keıin jáne tıisinshe tıesili kedendik bajdar men salyqtardy tólegennen keıin ǵana bolady.
«Jeke paıdalanýǵa arnalǵan sheteldik kólikti jáne óziniń avtokóligin ákelgen sheteldik tulǵalar belgili bir ýaqyttan keıin Qazaqstan aýmaǵynan (negizinen Grýzııa jáne Ázirbaıjan azamattary) ketetini baıqalady. Eýrazııalyq ekonomıkalyq odaqtyń kedendik aýmaǵyna sheteldik jeke tulǵalardyń Eýrazııalyq ekonomıkalyq odaqqa múshe bolyp tabylmaıtyn memlekette tirkelgen jeke paıdalanýǵa arnalǵan kólik quraldaryn bir jyldan aspaıtyn merzimge ýaqytsha ákelýine jol beriledi. Ýaqytsha ákelý merzimi aıaqtalǵannan keıin avtomobılder EAEO aýmaǵynan ketýge tıis. Árıne, osy kólik quraldaryn da zańdastyrýǵa bolady. Ol úshin bul kólikter ýákiletti organnyń (ІІM) belgilegen talaptaryna sáıkes kelýi kerek. Mysaly, qylmystyq áreketterge qatysy bar avtokólik quraldary, «oń jaq róldi» avtokólikter men kedendik tazartýdan ótpegen kólikter zańdastyrylmaıdy. Qazirgi ýaqytta ýákiletti organmen sheteldik avtokólikterdi zańdastyrýǵa qatysty QR zańnamasyna tıisti túzetilerdi engizý boıynsha jumystar júrgizilip jatyr»,- dedi Danııar Janalınov.
Komıtet tóraǵasy sondaı-aq, bazbir azamattardyń aýyr qarjylyq jaǵdaıyna baılanysty bank aldyndaǵy qaryzdaryn keshirý jaıyn da túsindirip ótti. Jańa zań jobasyna sáıkes, el azamattarynyń kredıtorlardyń talaptaryn tolyq kólemde qanaǵattandyrýǵa qabiletsizdigi kezinde týyndaıtyn qoǵamdyq qatynastardy retteý kózdelgen.
«Azamattardyń tólem qabiletin qalpyna keltirý rásimin, sonymen birge sottan tys jáne sot bankrottyǵy rásimderin qoldaný úshin negizder, olardy júrgizý tártibi men sharttary belgilengen. Bul rette boryshkerdiń joǵaryda kórsetilgen rásimderdiń birin qoldaný múmkindigi bereshektiń mólsherine, múliktiń bolýyna nemese bolmaýyna, banktik qaryz sharty nemese mıkrokredıt berý týraly shart boıynsha merzimi ótken bereshekti retteý nemese óndirip alý rásimin júrgizýge jáne basqa da talaptarǵa baılanysty bolady. Búgingi kúni Zań jobasy Qazaqstan Respýblıkasy Parlament Májilisiniń qaraýynda (29 sáýir kúni engizilgen). Zań jobasy Qazaqstan Respýblıkasy Parlamentiniń Májilisi men Senatynda odan ári talqylaýdan ótedi, oǵan áli de ózgerister enýi múmkin. Sonymen birge, bankterdiń qyzmeti boıynsha suraqtar týyndaǵan jaǵdaıda azamattarǵa Qarjy naryǵyn retteý jáne damytý agenttigine habarlasýlaryna bolady»,- dedi Danııar Janalınov.
Basqosýda sonymen qatar kólik salyǵyn tóleýdegi kezdesetin qatelikter men múlik salyǵyn ýaqytyly tólemegen jeke tulǵalarǵa aıyppul sanktsııalaryn salý tártibi túsindirildi. Ózbekstanmen shekaradaǵy keden beketterinen taýar alyp ótý tártibi men kólikterdi rásimdeýge qatysty túrli saýaldarǵa jaýaptar berildi.
