Grýzııa men Ázerbaıjan shekarany belgileý jumysyn jandandyrmaq
ASTANA. KAZINFORM — Grýzııa men Ázerbaıjan mártebesi áli kelisilmegen memlekettik shekaranyń 15 ýchaskesin anyqtaý jumystaryn jandandyrýǵa nıetti. Bul týraly Kazinform agenttigi NewsGeorgia basylymyna silteme jasap habarlady.
Tıisti kelisim 30 qazanda Sıgnahı qalasynda Grýzııa premer-mınıstri Iraklıı Kobahıdze men Ázerbaıjan premer-mınıstri Álı Asadovtyń kezdesýinen keıin jasaldy.
Grýzııa úkimetiniń basshysy ekijaqty kezdesý barysynda da, úkimetaralyq komıssııa otyrysynda da shekarany delımıtatsııalaý jáne demarkatsııalaý máseleleri talqylanǵanyn aıtty.
Kobahıdzeniń sózinshe, keıingi birneshe jylda shekaranyń qalǵan ýchaskelerin kelisý jumystary is júzinde ilgerilemegen. Endi eki el bul protsesti jedeldetip, daýly aýmaqtardy birtindep qarastyrýǵa nıetti.
Premer-mınıstrdiń naqtylaýynsha, túpkilikti kelisimge qol jetkizilmegen 15 ýchaske bar. Grýzııa tarapy Ázerbaıjanǵa osy baǵyttaǵy jaýapty vedomstvolardyń jumysyn jandandyrýdy usynǵan. Ázerbaıjan bul usynysty qoldaǵan.
Eki el arasyndaǵy qurlyqtaǵy memlekettik shekaranyń jalpy uzyndyǵy shamamen 440 shaqyrym bolady. Buǵan deıin taraptar shekaranyń úshten ekisine jýyǵyn kelisip alǵan. Alaıda Keńes Odaǵy ydyraǵannan keıin shamamen 180 shaqyrym aýmaqtyń quqyqtyq mártebesi áli rettelmegen.
Kúrdeli máselelerdiń biri — VI ǵasyrda negizi qalanǵan ortaǵasyrlyq Davıd-Garedjı monastyr kesheniniń qaı elge tıesili ekeni. Onyń birqatar qurylysy shekara syzyǵy kelisilmegen aýmaqta ornalasqan.
10 qazanda Ázerbaıjan prezıdenti Ilham Álıev Grýzııamen aradaǵy shekarany delımıtatsııalaý jáne demarkatsııalaý jónindegi memlekettik komıssııanyń jańartylǵan quramyn bekitti. Komıssııaǵa basshylyq etý eldiń syrtqy ister mınıstriniń orynbasaryna júkteldi.
Davıd-Garedjı monastyr kesheniniń aýmaǵyn qosa alǵanda, memlekettik shekarany anyqtaý máselesi eki el arasynda kóp jyldan beri talqylanyp keledi.
Eske salaıyq, buǵan deıin Qazaqstan men Ózbekstannyń shekarasyndaǵy ótkizý beketterinde jańa ózgeris kúshine enetinin jazǵanbyz.
