Grýzııa ІІM Jańa jylǵa deıin Tbılısıde narazylyq sherýlerine tyıym saldy

ASTANA. KAZINFORM – Polıtsııa narazylyq aktsııalaryna qatysýshylarǵa 21-31 jeltoqsan aralyǵynda Tbılısıde sherýler ótkizýge tyıym saldy. 

Tıisti málimdemeni Grýzııa ІІM taratady.

- 2025 jyldyń 21–31 jeltoqsanynda ótetin jınalys qatysýshylary qoǵamdyq qaýipsizdik pen tártipke, memlekettik organdardyń, kásiporyndar men uıymdardyń qalypty jumysyna, kóliktiń nemese jaıaý júrginshilerdiń qozǵalysyna, sondaı-aq basqa da adam quqyqtary men bostandyqtaryna qaýip tóndirmeıtindeı qatysýy tıis, — delingen habarlamada.

Atalǵan kúnderi demonstranttarǵa parlament ǵımaratynyń kireberisindegi baspaldaqta jáne oǵan jaqyn aýmaqta jınalý tapsyrylady, biraq «basqa azamattardyń trotýardaǵy nemese joldaǵy kólik qozǵalysyna kedergi keltirmeıtindeı» bolý kerek.

Bul sheshim mıtıngilerdiń bir uıymdastyrýshysy Kahı Tsıkarıshvılıdiń ótinishine jaýap retinde qabyldanǵan. Jaqynda jınalystar ótkizý erejeleri qatańdatylǵannan keıin polıtsııamen kelisý mindetti shartqa aınaldy.

Eger aktsııa qoǵamdyq tártipke, memlekettik organdardyń jumysyna, kólik qozǵalysyna nemese basqa azamattarǵa qaýip tóndiredi dep eseptese, ІІM mıtıngtiń ornyn nemese baǵytyn ózgertýge quqyly.

Polıtsııanyń talaptaryn oryndamaǵan qatysýshylar 15 táýlikke deıin jáne uıymdastyrýshylar 20 táýlikke deıin ákimshilik qamaýǵa alynady. Qaıta zań buzsa uıymdastyrýshylar úshin qylmystyq jaýapkershilik qarastyrylǵan, bir jylǵa deıin bas bostandyǵynan aıyrylady.

Aıta ketelik Grýzııa parlamenti mıtıngiler men sherýlerdegi zań buzýshylyqtar úshin jazany kúsheıtken edi.