Grýzııa Qazaqstanǵa qaryzyn tolyq qaıtarýǵa ýáde berdi

ASTANA. QazAqparat - Parlament Senatynyń jalpy otyrysynda palata depýtattary Qazaqstan Respýblıkasynyń aldyndaǵy Grýzııa Úkimetiniń bereshegin qaıtadan qaıta qurylymdaý jónindegi kelisimdi ratıfıkatsııalaý týraly zań jobasyn qabyldady, dep habarlaıdy QazAqparat.

«Grýzııa Úkimetiniń Qazaqstan Úkimetiniń aldyndaǵy boryshy 27 mln 774 myń AQSh dollaryn quraıdy. Ol 1992-1993 jyldary eki eldiń ulttyq bankteri arasynda ózara esep aıyrysý nátıjesinde paıda boldy jáne memlekettik nesıe retinde qaıta rásimdeldi. Qaıtadan qaıta qurylymdaý týraly kelisimge sáıkes, Grýzııa tarapy Qazaqstan aldyndaǵy bereshegin tıisti sharttar boıynsha óteıdi», - dedi QR Qarjy mınıstri Baqyt Sultanov.

Belgili bolǵandaı, jyldyq paıyzdyq mólsherlemesi 4 paıyz deńgeıde saqtalady. Sonymen qatar bereshekti óteý kestesi burynǵy kesteniń merziminen keshikkeni úshin jınalǵan ósimpuldy esepke almaıdy jáne Parıj klýby usynystaryna sáıkes uzartylady.

«Osylaısha, 2017 jylǵy Kelisimge sáıkes, 2017-2025 jyldardaǵy kezeńge Grýzııa tarapynyń tólemder somasy 37 mln 997 myń 815 AQSh dollaryn quraıdy», - dedi Qarjy mınıstri.

Jalpy otyrys barysynda senatorlar Qazaqstan aldyndaǵy ózge elderdiń qaryzdary jaıynda surady.

«Búginde osyndaı deńgeıde eki eldiń arasynda tolyq esep jasalyp, kelisimshartqa qol qoıylǵan mundaı boryshtar joq. Budan buryn Ázerbaıjan men Tájikstan bizge osylaı qaryz bolǵan edi, biraq olar ózderiniń bereshegin tolyq tólep bitti. Sondyqtan búgin qaralyp jatqan sońǵy kelisimshart. Grýzııa tarapynan tıisti tólemder kelip jatyr. Aldaǵy jylǵa da eshqandaı qıynshylyqty kórip turǵanymyz joq. Áriptesterimiz kelisim boıynsha tolyq óziniń mindettemelerin oryndaýǵa ýáde berip otyr», - dep túsindirdi Baqyt Sultanov.

Talqylaýlardan keıin palata depýtattary zań jobasyn qabyldady.