Grýzııa Qazaqstan aldyndaǵy qaryzyn tolyq ótedi

ASTANA. KAZINFORM — Grýzııa 2004 jylǵy shildede Parıj klýby aıasynda jasalǵan syrtqy qaryzdy qaıta qurylymdaý týraly kelisimder boıynsha nesıe berýshi elder aldyndaǵy barlyq mindettemelerin tolyq ótedi, dep habarlaıdy Kazinform agenttiginiń menshikti tilshisi Commersant basylymyna silteme jasap.

Parıj klýby — bul damýshy elderdiń qaryzyn qaıta qurylymdaýmen aınalysatyn beıresmı memleketter toby. Ol 1956 jyly qurylǵan jáne múshe elderdiń kelisimimen jumys isteıdi.

Basylymnyń dereginshe, Grýzııanyń jalpy qaryzy 225 mıllıon dollardan asqan, onyń ishinde 28 mıllıon dollary Qazaqstanǵa tıesili bolǵan. Bul somaǵa 1999 jylǵa deıingi merzimi ótken nesıeler, 1999–2004 jyldar aralyǵyndaǵy qaryz boıynsha paıyzdar, sondaı-aq 2004–2006 jyldarǵa josparlanǵan tólemder kirgen.

Qazaqstan aldyndaǵy sońǵy tólem 636 myń dollardy qurap, 2025 jyldyń qyrkúıeginde júzege asyryldy. Qaryzdy óteý protsesi 2011 jyly bastalyp, bıyl tolyǵymen aıaqtaldy.

Qazaqstannan bólek, Grýzııa 2004 jyly mynadaı negizgi nesıe berýshi elder aldyndaǵy qaryzyn qaıta qurylymdaǵan bolatyn:

• Reseı – 153 mln dollar

• Túrkııa – 53,4 mln dollar

• Armenııa – 19,6 mln dollar

• Ázerbaıjan – 16,2 mln dollar

• Iran – 12,8 mln dollar

2025 jyldyń qyrkúıegine qaraı bul elderge de Grýzııa barlyq bereshegin tolyq qaıtardy.

Qaryzdy óteý Grýzııaǵa qarjylyq qysymdy aıtarlyqtaı azaıtyp, merzimi ótken nesıelerdi bir júıege keltirýge jáne olardyń tólemin keıinge shegerýge múmkindik berdi.

Grýzııa Qarjy mınıstrligi qaryzdy óteýdiń aıaqtalýy eldiń qarjylyq turaqtylyǵyn nyǵaıtý, halyqaralyq seriktesterdiń senimin arttyrý jáne ekonomıkalyq ósimge jaǵdaı jasaý turǵysynan mańyzdy qadam ekenin atap ótti.

Buǵan deıin Halyqaralyq valıýta qory Grýzııanyń ekonomıkalyq saıasatyn oń baǵalaǵan bolatyn.