Grýzııa halqynyń 21 paıyzy absolıýtti kedeılik sheginen tómen jaǵdaıda ómir súrip jatyr

TBILISI. Grýzııa jańalyqtary-QazAqparat – Grýzııa halqynyń shamamen 21,3%-ynyń jaǵdaıy absolıýtti kedeılik sheginen tómen. Buǵan Grýzııa ulttyq statıstıka basqarmasy jarııalaǵan 2020 jylǵa arnalǵan kedeılik kórsetkishiniń sońǵy derekteri dálel, dep habarlaıdy QazAqparat Grýzııa jańalyqtary portalyna silteme jasap.

Absolıýtti kedeılik sheginen tómen ómir súretin halyqtyń úlesi 2019 jylmen salystyrǵanda 2020 jyly 1,8%-ǵa ósti. Statıstıkaǵa sáıkes, 2019 jyly Grýzııa halqynyń 19,5%-y absolıýtti kedeılik sheginen tómen ómir súrdi.

Sonymen qatar osy sanatqa jatatyn azamattardyń kópshiligi eldiń aýyldyq jerlerinde turady. Statıstıkter absolıýtti kedeılik sheginen tómen ómir súretin halyqtyń úlesi 2020 jyly Grýzııanyń aýyldyq bóliginde 27,5% jáne qalalarda 17,1% quraǵanyn aıtyp otyr.

Ulttyq statıstıka qyzmetiniń resmı málimetterine sáıkes, Grýzııa halqy azdap ósti jáne 2021 jyldyń 1 qańtarynda 3 728 600 adamdy qurady.

2020 jyly ortasha aılyq tabys otbasyna 6,4%-ǵa tómendep, 1100,5 larıdi (1 ları – 131 teńge) qurady, al halyqtyń jan basyna shaqqanda 4,4%-ǵa tómendep, 321,4 larıdi qurady.

Budan bólek, 541 764 adam nemese Grýzııa halqynyń 14,5%-y memleketten áleýmettik kómek alady jáne bul kórsetkish ótken jyly 83 296 adamǵa artty, dep habarlaıdy Grýzııanyń áleýmettik qyzmet kórsetý agenttigi.

151 myń otbasy úshin áleýmettik kómek - jalǵyz tabys kózi dep habarlaıdy agenttik.

Ótken jyly áleýmettik kómekke Grýzııanyń memlekettik bıýdjetinen 339 277 444 ları bólindi, al 2021 jyldyń alǵashqy úsh aıynda bul maqsatqa 89 818 591 ları aýdaryldy.